Daha bir hərbçimiz dünya çempionu oldu

Moskva şəhərində keçirilən hərbçilər arasında güləş üzrə 33-cü dünya çempionatında daha bir idmançımız qızıl medal qazanıb.

Müdafiə Nazirliyindən Lent.az-a verilən məlumata görə, Rusiya Federasiyası Mərkəzi Ordu İdman Klubunun idman zalında keçirilən yarışlarda 77 kiloqram çəki dərəcəsində MOİK nümayəndəsi Həsən Əliyev final görüşündə rusiyalı Çingiz Labazanovla qarşılaşıb. Gərgin keçən görüşdə həmyerlimiz 5-2 hesabı ilə qalib gələrək dünya çempionu adına layiq görülüb.

Qeyd edək ki, H.Əliyev hərbçilər arasında keçirilən dünya çempionatlarında ikinci dəfə qızıl medal qazanır. Bundan əvvəl o, 2016-cı ildə Makedoniyada keçirilən dünya çempionatında birinci yerə çıxaraq fəxri kürsünün ən yüksək pilləsini tutub.

82 kiloqram çəki dərəcəsində üçüncü yer uğrunda mübarizədə təmsilçimiz Rafiq Hüseynov almaniyalı R.Şvartzla qarşılaşaraq rəqibini 5-2 hesabı ilə məğlub edib və bürünc medala sahib olub.

87 kiloqram çəki dərəcəsində keçirilən qarşılaşmada həmyerlimiz İslam Abbasov bürünc medal uğrunda mübarizədə Almaniya idmançısı M.Remenspergerlə döşək üzərinə çıxıb. Bu qarşılaşmada da MOİK təmsilçisi 8-1 hesabı ilə qalib gələrək üçüncü yerə yüksəlib.

Beləliklə, hərbçilər arasında keçirilən çempionatda komandamız iki qızıl, üç gümüş və altı bürünc medal olmaqla ümumilikdə 11 medal qazanıb.