Rüşvət alan prokurorlara cinayət işi AÇILDI

Rusiyanın Moskva vilayəti üzrə Balaşixa şəhər məhkəməsində vilayət İstintaq Komitəsinin iki müstəntiqinə qarşı cinayət işi başlanıb. Onlar rüşvət almaqda ittiham olunurlar.

Lent.az yerli mediaya istinadla bildirir ki, rüşvətin məbləği 2,7 mindən çox bitkoindir. Bu da hazırda Rusiyada cinayət işləri tarixində rekord məbləğdir.

Məlumata görə, söhbət bir milyon yarımdan çox dollar və 2718 bitkoindən gedir ki, bu da rubl ekvivalentində 7,3 milyard rubl (təxminən 139 milyon 430 min manat) təşkil edir. İttiham olunan Marat Tambiyev və Kristina Lyaxovenko onları rüşvət qismində alıblar.

Müstəntiqlərin sözlərinə görə, müttəhimlər uzun müddətdir ki, “Infraud Organization” haker qrupunun üzvlərindən pul tələb ediblər. Bu qrup əcnəbilərin oğurlanmış bank məlumatlarının ticarəti ilə məşğul olub ki, bu da işi daha mürəkkəb və geniş miqyaslı edir. Bu iş üzrə ilk məhkəmə iclası iyun ayına təyin edilib və ictimaiyyətə qapalı keçiriləcək.

Qeyd edək ki, İstintaq Komitəsinin paytaxtın baş qərargahının Tverskoy rayonu üzrə istintaq şöbəsinə rəhbərlik edən mayor Tambiyev 2022-ci ilin martında həbs edilib. Kristina Lyaxovenko isə bir az sonra həbs olunub.

İclasın tarixi və vaxtı ilə bağlı məlumat açıqlanmayıb.