Səs-küylü məclislərdən və dostlarla görüşlərdən paylaşılan fotoların yerini başqa bir həyat tərzi tutur: insanın özü ilə baş-başa keçirdiyi sakit və xoş axşamlar. Sosial şəbəkələrdə tək vaxt keçirmək getdikcə daha çox müstəqillik və şəxsi rahatlığın ifadəsi kimi təqdim olunur.
Lent.az xarici mediaya istinadla xəbər verir ki, bir müddət əvvəl insanlar sosial şəbəkələrdə harada dincəldiklərini, kimlərlə dostluq etdiklərini və həyatlarının nə qədər rəngarəng olduğunu göstərməyə çalışırdılar. Ətrafda çox insanın olması uğurlu sosial həyatın əlaməti sayılırdı. İndi isə fərqli paylaşımlar diqqət çəkir.
Sakit axşamlar yeni dəbə çevrilir
“TikTok” və “Instagram”da insanların tək keçirdikləri axşamları göstərən videolar artır. Bu videolarda onlar evə qayıdır, rahat geyimə keçir, yoqa ilə məşğul olur, yemək hazırlayır, kitab oxuyur və ya sadəcə sakitlikdən zövq alırlar.
“Böyük şəhərdə tək yaşayıram və demək olar ki, dostum yoxdur” məzmunlu paylaşımlar da populyarlaşır. Bu sözlər artıq yalnız sosial təcridin etirafı kimi səslənmir. Bəzən arzulanan həyat tərzi kimi təqdim olunur.
Tək vaxt keçirmək artıq utanc sayılmır
Əvvəllər geniş dost çevrəsi olmayan insanlara çox vaxt yazığı gəlir və ya onları qəribə hesab edirdilər. İndi isə “Tək qala bilirəm və özümü yaxşı hiss edirəm” yanaşması daha çox görünür.
Bu dəyişiklikdə paylaşımların görünüşü də mühüm rol oynayır. Zövqlə bəzədilən mənzillər, dəbli geyimlər, özünə qulluq, idman, səyahət və təkbaşına içilən kokteyl fərqli təsəvvür yaradır. Belə insan ətrafında heç kimin olmamasından əziyyət çəkən biri kimi deyil, öz şəxsi məkanını şüurlu şəkildə seçən biri kimi görünür.
Nəticədə tək qalmaq utanılacaq vəziyyət olmaqdan çıxaraq gündəlik ünsiyyətin yorğunluğundan dincəlmək imkanı kimi qəbul edilir.
Bu həyat tərzi niyə insanlara yaxın gəlir?
Psixoloq və neyropsixoloq Sanam Hafizin sözlərinə görə, demək olar ki, hər insan həyatının müəyyən mərhələsində tənhalıq hissi yaşayır. Kiminsə bu barədə açıq danışması başqalarına da eyni hissləri yaşayan yeganə insan olmadıqlarını göstərir.
Bu mövzu pandemiya, məcburi köç və uzun müddət kompüterlə telefon ekranı qarşısında yaşamaq təcrübəsi olan gənclər üçün xüsusilə aktualdır. Belə dövrlərdən sonra bəzi insanlar üçün üz-üzə ünsiyyət qurmaq daha çətin və narahatedici olub.
Tək qalmaq bəzən yeni insanlarla tanış olmaqdan, hisslərini açmaqdan, münasibət qurmaqdan və rədd edilmək ehtimalı ilə üzləşməkdən daha asan görünür. Buna görə də insan təkliyi daha rahat və təhlükəsiz seçim saya bilər.
Tək qalmaqla özünü tənha hiss etmək fərqlidir
Öz istəyi ilə tək vaxt keçirmək və yaxın münasibətlərin yoxluğundan əziyyət çəkmək eyni şey deyil.
Təkbaşına vaxt keçirmək insana dincəlmək, düşüncələrini toplamaq və öz istəklərini anlamaq imkanı verə bilər. Öz yanında rahat olan insan başqalarının təsdiqindən də daha az asılı ola bilər.
Lakin bu, yaxın insanlara ehtiyacın yox olması demək deyil. Hafizin sözlərinə görə, belə paylaşımların riski insanın tənhalığı dəyişməz vəziyyət kimi qəbul etməsidir. Halbuki sosial əlaqələri tədricən genişləndirmək mümkündür.
Təkliyindən zövq alan insan da dost istəyə bilər
Bloger Tess Lavandanın videoları bu fərqi göstərir. O, az sayda dostunun olduğunu deyir, təkbaşına kokteyl içməyə gedir və səyahət edir. Bununla yanaşı, yaxın insanlara ehtiyac duyduğunu da açıq etiraf edir. Sadəcə, yeni dostlar qazanmaq onun üçün asan deyil.
Beləliklə, dəyişən əsas məsələ dostsuzluğun nüfuz göstəricisinə çevrilməsi deyil, insanların təkliyə münasibətidir. Cəlbedici görünən özünlə baş-başa qalmaqdan qorxmamaqdır: tək yeməyə getmək, plansız axşam keçirmək, təkbaşına səyahət etmək və ya evdə qalmağı uğursuzluq saymamaq.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
