Polis zabiti məhkəmə zalında həbs olundu

Rusiyanın Moskva şəhərində məhkəmə keçmiş rayon polis komissarı, 35 yaşlı Vladimir Gerasimçuku dələduzluqda və mütəşəkkil cinayətkar birliyə kömək etməkdə ittiham edərək 4 il müddətinə azadlıqdan məhrum edib.

Lent.az yerli mediaya istinadla bildirir ki, keçmiş polis zabiti dələduzluqda və vəzifə səlahiyyətlərindən istifadə edərək cinayətkar birliyin fəaliyyətində iştirakda təqsirli bilinib. O, cəzasını ciddi rejimli koloniyada çəkəcək. Təqsirləndirilən şəxs məhkəmə zalında həbs edilib.

Məhkəmənin müəyyən etdiyi kimi, 2015-ci ilin yanvarında Gerasimçuk Moskvanın Presnenski rayonu üzrə Daxili İşlər İdarəsinin yerli polis əməkdaşı olub. O, sakinlər və qeyri-yaşayış mənzilləri barədə məlumatları toplayıb, həmçinin mənzil sahiblərinin və mənzil sakinlərinin meyitlərinin tapılması ilə bağlı polisə daxil olan məlumatlara nəzarət edib. Müəyyən edilib ki, məhkum dünyasını dəyişmiş şəxslərin saxta şəxsiyyətini müəyyənləşdirib, onların vərəsə iddia edə biləcək qohumlarını axtarmayıb. O, bunu ağır və xüsusilə ağır cinayətlər törədən dələduzlara kömək məqsədilə edib.

Prokurorluğun məlumatına görə, müttəhim mütəşəkkil cinayətkar dəstənin iştirakçılarına zərərçəkmişlərin əmlakına sahiblik etmək imkanı verib. O, cinayətkar birlik üzvlərinin fotoşəkilləri olan mənzillərin sahibləri və sakinləri adına Rusiya Federasiyası vətəndaşlarının açıq-aşkar saxta pasportlarının qeydiyyatını və verilməsini təmin edib.