Keçmiş daxili işlər naziri saxlanıldı

Baş Prokurorluq Qazaxıstan Daxili İşlər Nazirliyinin keçmiş rəhbəri Erlan Turqumbayevin saxlanmasını elan edib.

Lent.az xarici mediaya istinadla bildirir ki, o, aprelin 29-da “Kantara işi” - 2022-ci ilin yanvar hadisələri ilə bağlı saxlanılıb. Turqumbayev “vəzifə səlahiyyətlərindən sui-istifadə, ağır nəticələrə səbəb olduqda” maddəsi ilə ittiham olunur.

Qeyd edək ki, Qazaxıstanda etirazlar yanvarın 2-də Manqistau vilayətinin Janaozen şəhərində maye qazın bir litrinin qiymətinin 120 təngəyə (təxminən 45 qəpiyə) yüksəlməsinə görə başlayıb. İki gün sonra Almatıda və bir sıra digər şəhərlərdə etirazçılarla polis və hərbçilər arasında toqquşmalar başlayıb. Aktobe, Taraz, Aktau və digər yaşayış məntəqələrində də toqquşmalar baş verib. İğtişaşları yatırtmaq üçün KTMT-nin sülhməramlı qüvvələri respublikaya göndərilib.

Ölkənin Baş Prokurorluğu bəyan edib ki, Turqumbayevə qarşı cinayət işində dövlət sirri təşkil edən məlumatlar var, ona görə də ibtidai istintaqın digər məlumatları açıqlana bilməz.