Dəhşətli cinayət: Anası və sevgilisi öldürdü, parçaladı və zibil kimi atdılar

Qurbanın anası və sevgilisi cəsəd parçalandıqdan sonra özləri polisə gəliblər.

İtaliyanın şimalındakı Cemona-del-Friuli kommunasında bütün ölkəni şoka salan vəhşi cinayət baş verib. 61 yaşlı Lorena V. və oğlunun Kolumbiya vətəndaşı olan 30 yaşlı sevgilisi şübhəlilərdən birinin oğlu 35 yaşlı Alessandro V.ni qətlə yetirməkdə ittiham olunurlar.

Lent.az bildirir ki, İtaliya mətbuatının məlumatına görə, kişinin cəsədi Udine şəhəri yaxınlığındakı zibil konteynerində tapılıb. Güman ki, cəsəd parçalanmağı sürətləndirmək və identifikasiyanı çətinləşdirmək üçün üç hissəyə kəsilib və əhənglə örtülüb. Müstəntiqlər hesab edir ki, həmin şəxs qətldən əvvəl narkotik maddə qəbul edib, sonra isə balta ilə öldürülüb.

Məlum olub ki, hər iki qadın polisə təslim olub. Qurbanın anası etdiyi hərəkətin nə qədər dəhşətli olduğunu anladığını qeyd edərək, günahını etiraf edib. Vəkili Covanni De Nardonun sözlərinə görə, qadın dərin şok vəziyyətində olub və istintaqa ətraflı ifadə verib. Cinayətin rəsmi motivi hələ müəyyən edilməyib.
.
Müstəntiqlər faciənin iyulun 25-də baş verdiyini, lakin qalıqların cəmi bir neçə gün sonra tapıldığını güman edirlər. Hazırda istintaq davam etdirilir, hadisənin bütün şəraiti aydınlaşdırılır.

Mərhumun altı aylıq bir qızı qalıb. Qız sosial xidmətin himayəsinə verilib.