Xəzərdə qalan balıqçıları FHN-in helikopteri xilas etdi

Noyabrın 12-nə keçən gecə Fövqəladə Hallar Nazirliyinin “112” qaynar telefon xəttinə Bakı şəhəri, Qaradağ rayonu ərazisində Daşgil adlanan sahədə 2 nəfər balıqçının dənizdə çətin vəziyyətə düşməsi ilə bağlı məlumat daxil olub. Lent.az-ın nazirliyin saytına istinadən verdiyi məlumata görə, havanın küləkli və dənizin dalğalı olması səbəbindən sahildən təqribən 2 km dənizə doğru köhnə, istifadəsiz estakadalar üzərində köməksiz vəziyyətdə qalıb.
Müraciət daxil olan kimi Fövqəladə Hallar Nazirliyinin Aviasiya dəstəsinin 1 ədəd helikopteri hadisə rayonuna cəlb olunub. Keçirilmiş xilasetmə əməliyyatları nəticəsində hər iki balıqçı xilas olunub.