Murmanskda 2 azərbaycanlı öldürüldü - YENİLƏNİB - TƏFƏRRÜAT

Rusiyanın Murmansk şəhərində 2 azərbaycanlı öldürülüb. Lent.az-ın yerli KİV-ə istinadən verdiyi məlumata görə, hadisə şəhər mərkəzindəki bazarda, anbarlar olan ərazidə baş verib.

Naməlum şəxslər 1976 və 1970-ci il təvəllüdlü həmyerlilərimizə atəş açaraq, qətlə yetiriblər. Murmansk polisi hazırda qətldə şübhəli bilinənləri axtarır. Onların 160-170 sm boyunda, kapüşonlu tünd rəngli gödəkcə geyinmiş 2 gənc olduqları bildirilir.

APA-nın Rusiya bürosunun məlumatına görə, dekabrın 4-də axşam saatlarında Murmanskın Xibinski küçəsi, ev 12 ünvanında silahlı insident qeydə alınıb. Nəticədə iki Azərbaycan vətəndaşı ölüb, biri isə ağır yaralanıb.

Ümumrusiya Azərbaycan Konqresinin Murmansk vilayəti üzrə nümayəndəsi Afil Hüseynov APA-nın Rusiya bürosuna açıqlamasında silahlı insident nəticəsində ölənlərin Lənkəran rayon sakinləri - 1976-cı il təvəllüdlü Nəriman Axundov və 1970-ci il təvəllüdlü Sədi Əzizov olduğunu bildirib: “Yaralı isə “Karina” ticarət mərkəzinin sahibi Həmid Kərimovdur. O, hazırda xəstəxanadadır. Vəziyyəti ağır olaraq qalır”.

Afil Hüseynov hadisənin təfərrüatları barədə də danışıb. Onun sözlərinə görə, qatillərin əsas hədəfi çox güman ki, Həmid Kərimov olub: “Nərimanla Sədi onun badına gediblər. Hadisə dünən axşam saatlarında Həmid Kərimovun meyvə-tərəvəz bazasında baş verib. Sədi ilə Nəriman Sankt-Petrburqdan və Moskvadan Murmanska meyvə-tərəvəz gətirməklə məşğul idilər. Həmin gün də onlar bazaya meyvə-tərəvəz gətirmişdilər. Bazanın sahibi Həmid Kərimov öz köməkçisi ilə birlikdə bazaya yoxlama aparmağa gəlib. Bu zaman onları izləyən naməlum şəxslər bazaya girərək atəş açmağa başlayıblar. Nəticədə Nəriman ilə Sədi ölüb, Həmid isə ağır yaralanıb. Qətli törədənlərin kapşonlu gödəkçə geyinmiş iki nəfər olduğu deyilir”.

A.Hüseynov yerli mətbuatda qətlin azərbaycanlılar tərəfindən törədilməsi haqqında yayılan məlumatların şayiə olduğunu söyləyib: “Qətli törədənlər rus millətindən olub”. Diaspor rəhbəri bu gün mərhumların cənazəsinin Azərbaycana göndəriləcəyini söyləyib: “Artıq bütün sənədlər hazırlanıb. Bu gün cənazələr Bakıya göndəriləcək”.