Kondaliza Rays qayıdır

Corc Buşun prezidentliyi dönəmində ABŞ dövləti katibi postunu tutmuş Kondaliza Rays daha 4 il müddətinə siyasətə dönməyə hazırlaşır.

Lent.az-ın ABŞ mətbuatına istinadən verdiyi məlumata görə, oktyabr ayında keçiriləcək prezident seçkilərində respublikaçıların namizədi olan Mitt Romninin vitse-prezident postunu Kondaliza Raysa təklif edəcəyi üzə çıxıb.

“The Drudge Report” saytı Respublikaçılar Partiyasındakı qaynaqlara istinadən yazıb ki, Mitt Romninin seçki kampaniyasını təşkil edən heyət dünən gecə “Meet the VP” (Vitse-prezidentlə Görüş) adı altında ianə toplama gecəsi təşkil edib. Xəbərdə Mitt Romninin Kondaliza Raysı vitse-prezidentliyə namizəd kimi seçmək qərarını bir neçə həftə əvvəl verdiyi vurğulanır. Kondaliza Rays bir neçə həftə Yuta ştatında iştirak etdiyi seçki kampaniyasında ABŞ-ın dünyadakı liderlik rolunun mübahisə mövzusuna çevrildiyini söyləyib. Kondaliza Rays həmin aksiyada çıxışından sonra Respublikaçılar Partiyasının tərəfdarlarına göndərdiyi bir elektron məktubda yazıb ki, 2012-ci il ABŞ üçün dönüş nöqtəsi ola bilər: “Qarşıdakı seçkilər həyatımda gördüyüm ən əhəmiyyətli seçki olacaq. Mənə xarici siyasətimizlə bağlı çox suallar verilir və qarşımdakı imkanlar soruşulur. Ancaq biz evimizi qaydaya salmadan beynəlxalq arenada önümüzə çıxan imkanları istiqamətləndirmək şansımızın olduğunu düşünmürəm”.