Əhmədinejadın təyyarə hədiyyəsi sahibinə çatdırıldı

İran prezidenti Mahmud Əhmədinejadın mart ayında Aşqabada səfəri zamanı Türkmənistan prezidenti Qurbanqulu Berdiməhəmmədova hədiyyə etdiyi İran istehsalı olan təyyarə sahibinə çatdırılıb. Lent.az-ın “trtazerbaycan.com” saytına istinadən verdiyi məlumata görə, LSA tipli, “Azad Quş” iki nəfərlik təyyarə dünən Aşqabad Beynəlxalq Hava Limanına aparılıb.

Qiyməti 130 min dollar olan təyyarənin Aşqabada gətirilməsi münasibəti ilə keçirilən tədbirdə türkmən nazirlər, İranın Aşqabaddakı səfirliyinin əməkdaşları və vətəndaşlar iştirak ediblər.

Xatırladaq ki, Qurbanqulu Berdiməhəmmədov keçən il ölkəsinin buğda istehsalında lazımi normanı doldurması münasibətilə İrana min ton un bağışlayıb. Mahmud Əhmədinejadın təyyarə hədiyyəsinin də bu jestə cavab olduğu bildirilir.

Türkmənistan mediasının xəbərinə görə, “Azad Quş” texniki baxımdan öz sinfində dünyada üçüncü yerdədir. İran son texnologiya ilə təchiz edilən bu təyyarənin kütləvi istehsalına 6 ay öncə başlayıb.