Türkiyənin Azərbaycandakı sabiq səfiri danışdı, Avstriya qarışdı

Lent.az-ın “Milliyət” qəzetinə istinadən verdiyi məlumata görə, Qədri Ecved Tezcan deyib ki, Avstriyada türklərin cəmiyyətə inteqrasiyasında problem varsa, bunun günahkarı Avstriya hökumətidir.

Səfir bildirib ki, türklər Vyanada bələdiyyə evlərində həmişə eyni səmtdə yerləşdirilirlər: “Avstriyalı ailələr isə etnik azlıqların çoxluq təşkil etdiyi məktəblərə uşaqlarını göndərmirlər. Yəni türklər bir bucağa sıxışdırılırlar. Türklər bu ölkədə xoşbəxtdirlər, sizdən bir şey istəmirlər. Sadəcə, bir bucağa sıxışdırılmış virus münasibəti görmək istəmirlər”.

Avstriya Xarici İşlər Nazirliyinin sözçüsü Alexander Schallenberg isə Qədri Ecved Tezcanın açıqlaması ilə bağlı dərhal Xarici İşlər Nazirliyinə çağırıldığını bildirib. Avstriya xarici işlər naziri Michael Spindelegger səfirin nazirliyə çağırılmasının ardından türkiyəli həmkarı Əhməd Davudoğlunu telefonla arayıb və bu məsələni müzakirə edib. Avstriyanın Türkiyədəki səfiri də Türkiyə Xarici İşlər Nazirliyindən görüş tələb edib.

Qeyd edək ki, Qədri Ecved Tezcan Türkiyənin Azərbaycanda səfiri olub.