Ortaq, yoxsa ayrı büdcə: Gənc cütlüklər üçün hansı daha uyğundur?

İki insan bir həyatı paylaşmağa başladıqda, pul məsələsi bəzən görünməz bir divara çevrilir. Bəziləri tam şəffaflığı arzulayır, digərləri isə maliyyə müstəqilliyini itirməkdən qorxur. Büdcə modeli seçimi münasibətləri möhkəmləndirə və ya əksinə, münaqişələrin səbəbi ola bilər.

Lent.az bu mövzu ilə bağlı məlumatları təqdim edir:

Ortaq büdcə

Ortaq büdcə o deməkdir ki, cütlük bütün gəlirlərini birgə hesabda birləşdirir. Bu vəsaitdən kommunal xərclər, ərzaq, əyləncə və digər ehtiyaclar üçün ödənişlər edilir.

Üstünlükləri

Tam şəffaflıq – Hər iki tərəf bütün xərcləri görür və planlaşdırmada iştirak edir.

Ailə birlik hissi yaradır – Pul cütlüyü daha da yaxınlaşdırır.

Çatışmazlıqları

Şəxsi ehtiyaclar ikinci plana keçir – Fərdi xərclər üçün azadlıq məhdudlaşır.

Mütəxəssislərin tövsiyəsi

Əvvəlcədən müəyyənləşdirmək lazımdır ki, nə qədər vəsait məcburi xərclərə, nə qədəri yığım vəsaitlərinə ayrılacaq. Yığım hesablarını ayrıca saxlamaq daha yaxşıdır ki, onlar gündəlik xərclər üçün sərf edilməsin.

Ayrı büdcə

Ayrı büdcə hər iki tərəfə öz gəlirlərini müstəqil idarə etmək imkanı verir. Cütlük əvvəlcədən razılaşır ki, kim hansı ortaq ödənişləri edəcək və qalan vəsaiti öz istəyi ilə xərcləyə bilir.

Üstünlükləri

Fərdi maliyyə azadlığı – Hər kəs öz pullarını istədiyi kimi xərcləyə bilər.
Gərəksiz xərclər üzərində mübahisələr olmur – Hər kəs öz məsuliyyətini daşıyır.

Çatışmazlıqları

Məsafə yarana bilər – Əgər tərəflərdən biri maliyyə çətinliyi yaşasa, digəri kömək etməyə bilər.

Mütəxəssislərin tövsiyəsi

Bu model fərqli gəlir və xərcləmə vərdişlərinə malik olan cütlüklər üçün uyğundur. Əsas məsələ əvvəlcədən hansı xərclərin ortaq olduğunu müəyyənləşdirmək və bu qaydalara dəqiq əməl etməkdir.

Ortaq və ya ayrı büdcə seçimi etibar və müstəqillik arasında balans yaratmağa bənzəyir. İdeal model yoxdur, amma sizə ən uyğun olan büdcə modelini yaratmaq mümkündür.