Kreslonun qolaltı hissəsində gizlədilmiş kiçik bir düymə uçuş zamanı rahatlığı artırmaq üçün olduqca sadə, amma effektli həll təqdim edir. Son günlər sərnişinlər bu qəribə düyməni fəal şəkildə müzakirə edir və mövzu TikTok-da böyük marağa səbəb olub.
Lent.az xarici mediaya istinadla xəbər verir ki, qısa zamanda minlərlə bəyənmə və şərh toplayan video sosial şəbəkədə sürətlə yayılıb.
Böyük Britaniyadan olan stüardessa, TUI aviaşirkətində çalışan Çarli Silver şəxsi məkanı artırmaq üçün sadə bir taktika paylaşıb. Videoda o, kreslonun qolaltı hissəsini necə qaldırmağın mümkün olduğunu göstərib. Bunun üçün sadəcə olaraq mexanizmin yaxınlığında yerləşən gizli düyməni sıxmaq kifayətdir. Video 430 mindən çox baxış toplayaraq istifadəçilər arasında geniş müzakirələrə səbəb olub.
Məlum olub ki, indiyədək bir çox sərnişin bu imkanın mövcudluğundan xəbərsiz olub. Şərhlərdə bəzi istifadəçilər zarafatla bu düymənin qəhvə hazırlaya və ya pəncərəni aça biləcəyini yazsa da, onun real funksiyası daha sadədir. Düymə qolaltını qaldırmağa imkan verir ki, bu da pencəyi asmaq və ya oturacaqda bir qədər daha çox şəxsi məkan yaratmaq üçün istifadə oluna bilər.
Kayak şirkətinin 2023-cü ildə ABŞ və Kanadada 1000 sərnişin arasında apardığı araşdırma göstərib ki, qolaltıların idarə olunması uçuş zamanı komfort üçün olduqca vacibdir, xüsusilə də orta yerdə əyləşən sərnişinlər üçün. Sorğuda iştirak edənlərin əksəriyyəti hesab edir ki, keçid tərəfində oturan şəxsin hər iki qolaltını tutması düzgün deyil.
TikTok istifadəçilərinin bir çoxu bu sadə məsləhətə görə Çarli Silverə təşəkkür edib və etiraf ediblər ki, bu məlumatı daha əvvəl bilmək istərdilər. İndi isə bu kiçik detal sayəsində sərnişinlər qonşularına narahatlıq yaratmadan özləri və əşyaları üçün bir qədər əlavə yer əldə edə biləcəklər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
