Telefonunuza gizli hücum olur? - Bu cür biləcəksiniz

Müasir smartfonlarda şəxsi məlumatların böyük hissəsi saxlanıldığı üçün kibercinayətkarlar istifadəçilərin cihazlarına gizli şəkildə daxil olmağa çalışırlar. Mütəxəssislər smartfonun izlənilməsi və ya məlumatların oğurlanması ehtimalını göstərə biləcək əsas əlamətləri açıqlayıb, eyni zamanda istifadəçilərə təhlükəsizliklə bağlı vacib tövsiyələr veriblər.

Lent.az xəbər verir ki, ekspertlərin sözlərinə görə, diqqət yetirilməli ilk əlamətlərdən biri smartfonun istifadə edilmədiyi halda belə həddindən artıq isinməsidir.

Cihaz gözləmə rejimində olmasına baxmayaraq isti qalırsa, bu, arxa planda işləyən naməlum proqramların və ya şübhəli proseslərin mövcudluğundan xəbər verə bilər.

Digər mühüm əlamət batareyanın əvvəlkindən daha sürətlə boşalmasıdır. Əgər istifadə vərdişləriniz dəyişməyib, lakin telefonun enerjisi qısa müddətdə tükənməyə başlayıbsa, bunun səbəbi arxa planda fasiləsiz işləyən proqramlar ola bilər. Mütəxəssislər smartfonun qəfil yavaşımasına da diqqət yetirməyi tövsiyə edirlər. Proqramların gec açılması, sistemin donması və ya ümumi performansın zəifləməsi cihazın əlavə yüklənməsi ilə əlaqəli ola bilər.

Telefon danışıqları zamanı eşidilən kənar səslər, əks-səda və ya tez-tez yaranan maneələr də diqqətdən kənarda qalmamalıdır. Bu cür problemlər əksər hallarda mobil rabitənin keyfiyyəti ilə bağlı olsa da, bəzi hallarda üçüncü tərəf proqramlarının müdaxiləsinə işarə edə bilər.

Bundan başqa, istifadəçinin özü quraşdırmadığı naməlum tətbiqlərin telefonda görünməsi ciddi xəbərdarlıq siqnalı hesab olunur. Belə hallarda cihazdakı tətbiqlərin siyahısını yoxlamaq, tanımadığınız proqramları silmək və onların hansı icazələrə malik olduğunu nəzərdən keçirmək tövsiyə edilir.

Məlumatların təhlükəsizliyini artırmaq üçün mütəxəssislər açıq Wi-Fi şəbəkələrinə avtomatik qoşulma funksiyasını söndürməyi, tətbiqlərin kamera, mikrofon və digər məlumatlara giriş icazələrini mütəmadi yoxlamağı, əməliyyat sistemini daim yeniləməyi və bütün vacib hesablar üçün iki mərhələli identifikasiya funksiyasını aktivləşdirməyi məsləhət görürlər. Bu sadə addımlar şəxsi məlumatların icazəsiz əldə olunması riskini əhəmiyyətli dərəcədə azalda bilər.