Süni intellekt sahəsində çalışan aparıcı alimlər hesab edirlər ki, klassik çat-botların inkişafı artıq müəyyən həddə çatıb. Onların fikrincə, gələcək inkişaf yalnız mətn üzərində öyrənən modellərlə deyil, real dünyanı dərk edə bilən yeni nəsil süni intellekt sistemləri ilə mümkün olacaq.
Lent.az xəbər verir ki, alim Fei-Fei Linin sözlərinə görə, müasir böyük dil modelləri əsasən kitablar və digər mətnlərdəki statistik əlaqələri öyrənir.
Alimin sözlərinə görə, növbəti mərhələdə süni intellekt ətraf mühiti "oxumağı", yəni real dünyanı müşahidə edib başa düşməyi öyrənməlidir.
Çat-botlar fiziki dünyanı anlamırlar
Martial Hebert izah edir ki, bugünkü çat-botların ən böyük məhdudiyyəti onların fiziki mühiti dərk edə bilməməsidir.
Onlar məkanın həndəsəsini, hərəkətin dinamikasını və müxtəlif səthlərin xüsusiyyətlərini anlamadıqları üçün real həyatda sadə görünən tapşırıqları belə yerinə yetirə bilmirlər.
Alimin sözlərinə görə, hazırda heç bir çat-bot müstəqil şəkildə masanın üzərindəki qəhvə fincanını götürə bilmir. Çünki bunun üçün məkanın quruluşunu, əlin hərəkət trayektoriyasını və obyektlə fiziki təması düzgün qiymətləndirmək lazımdır. Bu isə növbəti sözü və ya pikseli proqnozlaşdırmaqdan qat-qat mürəkkəb prosesdir.
Məqsəd – süni intellektə reallığı anlamağı öyrətməkdir
Mütəxəssislər bildirirlər ki, növbəti mərhələdə əsas diqqət "dünya modelləri"nin (World Models) yaradılmasına yönələcək. Bu modellər süni intellektə ətraf mühiti anlamağa, öz hərəkətlərinin nəticəsini əvvəlcədən proqnozlaşdırmağa və dəyişən şəraitə uyğun davranmağa imkan verəcək.
Kompüter alimi Luis Castricato hesab edir ki, böyük dil modelləri üzərində fundamental araşdırmalar mərhələsi artıq geridə qalıb və sənaye daha interaktiv sistemlərin hazırlanmasına keçir.
Onun fikrincə, "dünya modelləri" insanın sinir sistemi və onurğa beyninə bənzər şəkildə işləyərək süni intellektin ətraf mühitdə baş verən dəyişikliklərə dərhal uyğunlaşmasına şərait yaradacaq.
Castricatonun rəhbərlik etdiyi şirkət artıq bu texnologiyadan istifadə edərək virtual personajların ətraf mühitlə qarşılıqlı əlaqəsinə uyğun olaraq dəyişən üçölçülü oyun məkanları hazırlayır.
Bu istiqamətdə mühüm addımlardan biri də NVIDIA tərəfindən təqdim edilən Cosmos 3 modelidir.
Şirkətin açıqlamasına görə, yeni açıq əsas model təkcə mətn, şəkil, video və səs məlumatlarını deyil, həm də fiziki hərəkətləri emal edə bilir. Sistem hadisələrin necə inkişaf edəcəyini proqnozlaşdırmaq və obyektlərin real dünyadakı davranışını modelləşdirmək imkanına malikdir.
Bu modeldən gələcəkdə robotların öyrədilməsi üçün istifadə olunacağı gözlənilir. Jensen Huang bildirib ki, multimodal süni intellekt sahəsində əldə olunan bu irəliləyişlər "fiziki süni intellekt" adlandırılan yeni dövrün başlanmasını sürətləndirir. Bu mərhələdə süni intellekt yalnız məlumat emal etməklə kifayətlənməyəcək, həm də real dünyanı qavrayaraq onunla qarşılıqlı əlaqə qura biləcək.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
