Lent.az-ın qəhrəmanı, məşhur İvonna nənə vəfat etdi

İmişlidə yaşayan, 73 il əvvəl azərbaycanlı partizan Şəmməd Şirməmmədova qoşularaq Azərbaycana gələn İvonna nənə bu gün səhər saatlarında vəfat edib.

İmişlinin Murğuzalılar kəndində yaşayan İvonna nənəni ilk dəfə Lent.az-ın əməkdaşı Səbuhi Məmmədli üzə çıxarıb.

İmişlidə iki il yaşayandan sonra onun həyat yoldaşı Şəmməd Şirməmmədov qəfil vəfat edib. Onların Rəfael adında övladları qalıb. O, Rəfaili də götürüb Fransaya getmək istəsə də, sovet hökuməti onu buraxmamışdı. Bundan sonra İvonna nənə Azərbaycanda yaşamalı olmuşdu. O, sonradan ikinci dəfə ailə qurmuşdu, bu izdivacdan onun bir neçə uşağı var idi.

2011-ci ildə İvonna nənənin həyat hekayəsi Lent.az-da dərc ediləndən sonra Avropa Azərbaycan Cəmiyyəti onun taleyi ilə maraqlandı və 64 ildən sonra İvonna nənə öz vətəninə gedə bildi.

90 yaşlı İvonna nənə ayaq qanqrenasından əziyyət çəkirdi. Dünən əməkdaşımız Səbuhi Məmmədli İvonna nənə ilə son dəfə görüşüb. Bir qədər sonra Lent.az-da İvonna nənənin son müsahibəsi yayımlanacaq.