DSMF əməkdaşları Beynəlxalq Sosial Təminat Assosiasiyasının iclasında iştirak edib

Oktyabrın 20-22-də İsveçrə Konfederasiyasının Cenevrə şəhərində Beynəlxalq Sosial Təminat Assosiasiyasının (BSTA) 111-ci Büro iclası keçirilib.

Fondun mətbuat xidmətindən Lent.az-a verilən məlumata görə, Dövlət Sosial Müdafiə Fondunun nümayəndə heyətinin də iştirak etdiyi iclasda BSTA-nın yeni büro üzvləri, Texniki Komissiyaları ilə bağlı məsələlər, 2014-cü ilin maliyyə yekunlarına dair hesabatlar, 2015-ci ildə BSTA-nın fəaliyyəti, 2016-cı ildə keçiriləcək beynəlxalq tədbirlərin təqvimi və növbəti üçillik dövr (2017-2019-cu illər) üçün BSTA-nın ilkin fəaliyyət planı müzakirə olunub.

Dövlət Sosial Müdafiə Fondunun nümayəndə heyətinin iştirak etdiyi BSTA Avropa Şəbəkəsi Rəhbər Komitəsinin iclasında BSTA Avropa Şəbəkəsi çərçivəsində 2015-ci ildə görülmüş işlər, eləcə də növbəti ildə həyata keçirilməsi nəzərdə tutulan tədbirlər müzakirə edilib. Bundan əlavə, Fondun nümayəndələri BSTA-nın, habelə Rusiya, Polşa, Almaniya, Litva, Finlandiya və digər BSTA üzvü olan ölkələrin pensiya və sosial sığorta təşkilatlarının nümayəndə heyətləri ilə ikitərəfli görüşlər keçirərək, qarşılıqlı əməkdaşlıq perspektivlərini müzakirə ediblər.

Qeyd edək ki, Azərbaycan 2007-ci ildən Assosiasiyanın Avropa Şəbəkəsi Rəhbər Komitəsinin üzvüdür və 2013-cü ildə təkrarən Rəhbər Komitəyə üzv seçilib. BSTA-nın bir cox beynəlxalq tədbirlərınə ev sahibliyi edən ölkəmiz Assosiasiya çərçivəsində yüksək səviyyəli qərarların qəbul edilməsində xüsusi rola malikdir.