36 ildən sonra... kişi öz valideynləri ilə yaşamadığını öyrəndi - nə baş verdi?

Kişilər təsadüfən doğum evində qarışıq salındıqlarını biliblər

36 il sonra iki amerikalı təsadüfən öyrənib ki, doğuşdan sonra doğum evində qarışıq salınıblar və bütün həyatları boyu başqalarının ailələrində böyüyüblər. İndi hər iki ailə ölümcül səhvin baş verdiyini söylədiyi tibb müəssisəsini məhkəməyə verir.

Lent.az-ın xarici mediaya istinadən məlumatına görə, hekayə ABŞ-ın Şimali Dakota ştatında baş verib. 1988-ci ildə Kayl Baylin və Ceremi Morrison Qraftondakı Unity Medical Centerdə dünyaya gəliblər. Ailələr iddia edirlər ki, körpələr təsadüfən səhv valideynlərə verilib və onlar həqiqəti yalnız onilliklər sonra öyrəniblər.

Ceremi Morrison, DNT sayəsində qohumlarını tapmaq istəyəndə başqa birisi ilə səhv salındığını öyrənib. Bibisi genetik testdən keçib və nəticədə sistemdə alqoritm tərəfindən qardaşı oğlu kimi müəyyən edilən Kayl Baylin adlı bir kişi meydana çıxıb.

Əvvəlcə ceremi bunun necə mümkün olduğunu başa düşə bilməyib, çünki o, heç vaxt belə bir qohum haqqında eşitməyib. Lakin bu kəşf onu bütün həyatı boyu narahat edən bir sualı izah etməyə kömək edib.

"Ailəmdə mənə bənzəyən heç kim yox idi. Qara saçlı qohumların ailəsində yeganə sarı saçlı uşaq mən idim", - o bildirib.

Sonradan aparılan DNT testi göstərib ki, 36 ildir valideynləri olduğuna inandığı insanlar əslində Kaylın bioloji valideynləridir.

Cereminin sözlərinə görə, səhv baş verməsəydi, həyatı tamamilə fərqli ola bilərdi.

"Yəqin ki, varlığından belə xəbərsiz olduğum böyük qardaşımla fermada işləyərdim", - o bildirib.

Kişi həmçinin qeyd edib ki, doğuşdan sonra təsadüfən başqasının yerini dəyişmə ehtimalını istisna edir, çünki hər iki ailə fərqli yerlərdə yaşayıb və uşaqların bir-biri ilə əlaqəsi olmayıb.

Kayl və Ceremi hələ şəxsən görüşməsələr də, valideynlər artıq bioloji oğulları hesab etdikləri kişilərlə tanış olublar.

Hər iki ailə xəstəxanaya qarşı məhkəmə iddiası qaldırıb.

Tibb mərkəzi iddiaları rədd edir və məhkəmədən işi ləğv etməsini xahiş edir. Xəstəxana açıqlamasında hazırda bu "son dərəcə qeyri-adi vəziyyətin" bütün hallarını aydınlaşdırmağa çalışdığını vurğulayıb.

"Hər iki kişi 1988-ci ildə xəstəxanamızda eyni gündə dünyaya gəlib və biz bu kəşfin onlara və ailələrinə dərin təsirini anlayırıq", - açıqlamada vurğulanır.

Xəstəxana həmçinin izah edib ki, təxminən 40 il sonra həmin dövrə aid tibbi və şəxsi qeydlər yoxa çıxıb və körpələri dünyaya gətirən işçilərdən heç biri indi xəstəxanada işləmir.