“Gənc nəsil – sərhədsiz həyat”

Rusiyanın paytaxtı Moskvada MDB-nin yaranmasının 20 illiyinə həsr olunmuş “Gənc nəsil – sərhədsiz həyat” Gənclər Forumuna start verilib. Gənclər və İdman Nazirliyinin mətbuat xidmətindən Lent.az-a verilən məlumata görə, tədbir Dövlətlərarası Sərgi və sərgi işçi proqramı çərçivəsində keçirilir.

Bu günlər ərzində Moskvada Gənclərin XI Ümumrusiya Elmi-texniki Yaradıcılıq Sərgisi və Konfransı da keçirilir. İyunun 28-də Ümumrusiya Sərgi Mərkəzində start götürən sərgi 6 gün davam edəcək. Sərgidə təşkil edilmiş Azərbaycan Respublikasının Milli Pavilyonunda Gənclər və İdman Nazirliyi də öz növbəsində gənclər və idman sahəsinə dair məlumat-foto stendi, video çarxları, çap və digər sərgi materialları ilə təmsil olunur. Gənclər tədbirlərində isə Azərbaycan Respublikası Gənclər təşkilatlarının rəhbər və nümayəndələri məruzələrlə çıxış edirlər. MDB-nin 20 illik yubileyinə həsr edilmiş tədbirlər çərçivəsində Azərbaycan nümayəndə heyətinin tərkibində Gənclər və İdman Nazirliyindən 9 nəfər yer alıb.

Qeyd edək ki, nümayəndə heyətinə nazirliyin rəsmisi Elmir Mehdiyev rəhbərlik edir.