“İçərişəhər” yüksək liqada yarışacaq

I İçərişəhər İntellektual Festivalının qalibi olan komanda Xəzər İntellektual Gənclər Klubunun sıralarında çıxış etmək hüququ qazanıb. Lent.az-ın məlumatına görə, müxtəlif universitetlərdə təhsil alan komanda üzvləri peşəkar intellektual oyunlarda karyeralarını davam etdirmək niyyətində olduqlarını bildiriblər.

“İçərişəhər” adı ilə çıxış edəcək komanda festivalın qalibi olmaqla Gənclər və İdman nazirliyinin dəstəyi ilə həyata keçirilən “Universitet liqası” layihəsində birbaşa iştirak hüququ əldə edib. Həmçinin bildirilib ki, komandanın yüksək liqada və gələcəkdə təşkil edəcəyi digər turnirlərdə iştirakına hər cür şərait yaradılacaq.

Qeyd edək ki, I İçərişəhər İntellektual Festivalı 25 iyunda Xəzər İntellektual Gənclər Klubu, İrəli İctimai Birliyi və İçərişəhər Dövlət Tarix-Memarlıq Qoruğu İdarəsinin birgə təşkilatçılığı ilə təşkil olunub. Festivalın keçirilməsində əsas məqsəd gənclər arasında elmə, biliyə və intellektual oyunlara olan marağı artırmaq və tarixi irsimizi təbliğ etməkdir.