Mübariz İbrahimova həsr edilən müsabiqənin qalibləri mükafatlandırıldı

“Kaspi” qəzetinin Milli Qəhrəman Mübariz İbrahimovun xatirəsinə həsr etdiyi müsabiqə başa çatıb və bu gün nəticələr elan olunub. Lent.az-ın məlumatına görə, qaliblərin mükafatlandırılması mərasimində “Kaspi” qəzetinin baş redaktoru Natiq Məmmədli bildirib ki, əvvəlcədən müəyyən edilmiş şərtlərə əsasən, müsabiqəyə yalnız vətənpərvərlik mövzusunda yazılan və KİV-lərdə dərc olunmuş hekayə, povest, şeir və publisistik məqalələr qəbul edilib. Müsabiqəyə ümumilikdə 86 əsər təqdim olunub və onlardan 3-ü şərtlərə uyğun gəlmədiyindən müsabiqədən çıxarılıb.

Müsabiqənin 3 qalibi müəyyənləşdirilib (birinci yer – 1000 manat, ikinci yer - 500 manat, üçüncü yer – 300 manat). Bundan əlavə, hər biri 200 manat olmaqla 5 həvəsləndirici mükafat da verilib. Natiq Məmmədli deyib ki, müsabiqəyə təqdim olunan əsərlərin rəngarəngliyini və çoxluğunu nəzərə alan münsiflər heyəti hər biri 200 manat olmaqla 5 xüsusi mükafatın da verilməsini qərara alıblar.

Müsabiqədə ilk üç yer üzrə qalib gələn yazılar bunlardır:
Hafiz Mirzənin "Olaylar" qəzetində dərc olunan “Qeyrət” hekayəsi;
Zəkurə Quliyevanın “Qarabağ” qəzetində çıxan “Ermənilərə tarix dərsi” məqaləsi;
Valeh Məhərrəmlinin “Şərq” qəzetində dərc olunan “Hünər” poeması.

Xüsusi mükafat alanlar:
Oqtay Qorçu “Torpaq üstə, yarpaq üstə, göz üstə” hekayəsi (“Mediaforum” saytı);
İmdad Məmmədli “Qarabağ havaları” şeir (İctimai televiziya);
Mustafa Kəmərli “Mübariz” povesti;
Yusif Kərimov “Təmas xəttində məktublar” (“İki sahil” qəzeti) ;
Rahilə Elçin “Milli qəhrəmanın vətən qüruru”.

Həvəsləndiri mükafat alanlar:
Nigar Vaqifqızı, “Soruşma vətən sənin üçün nə edib” məqaləsi (“Azadlıq” qəzeti);
Balayar Sadıq, “Hünər simfoniyası” poeması (“Paritet” qəzeti);
Fərid Hüseyn, “Müqəddəs adam haqqında yeddi tezis” məqaləsi ("kitabxana.net" saytı);
Rizvan Nəsiboğlu, “Təpədən dırnağa qədər Vətəndir, Vətən” şeiri (“Bütöv Azərbaycan” qəzeti);
Mirdamət Əziz, “Gedək Mübarizin arxasınca biz” şeiri (“Ədalət” qəzeti).

Fəxri fərman:
Aygül Rəhim, “Azadlıq” hekayəsi (Bakı məktəb liseyi).
Qaliblərin mükafatlandırılması mərasimində "Kaspi" qəzetinin təsisçisi Sona Vəliyeva, Azərbaycan Mətbuat Şurasının sədri Əflatun Amaşov, KİV-in İnkişafına Dövlət Dəstəyi Fondunun sədri Vüqar Səfərli çıxış edərək Mübariz İbrahimovun döyüş şücaətindən danışıblar. Çıxışçılar Milli Qəhrəmanın keçdiyi həyat yolunun Azərbaycan gəncləri üçün örnək olmasını xüsusi qeyd ediblər.

Elxan SALAHOV