Bakıda 50 yeni yaşayış binası qanunsuz istifadəyə verilib

“APA-ECONOMICS”in məlumatına görə, bunu Azərbaycan Fövqəladə Hallar Nazirliyinin Tikintiyə nəzarət Dövlət Agentliyi Baş Dövlət Tikinti Müfəttişliyinin rəisi Xalid Nəcəfov bildirib.

Onun sözlərinə görə, hazırda həmin binalarda yoxlamalar aparılır, layihəyə uyğunluğu yoxlanılır, təhlükəsizliyə nə qədər cavab verməsi araşdırılır: “Belə binaların bir neçəsində pozuntular aşkarlanıb. Belə ki, bu binaların birində hətta sakinlərin köçürülməsi gözlənilir”.

X.Nəcəfovun sözlərinə görə, Yeni Yasamalda artıq bir neçə il istismarda olan “Gənc alim” yaşayış binasında artıq indidən zəifləmələr müşahidə olunur: “Hazırda bu zəifləmələrin aradan qaldırılması üçün işlər aparılır və ola bilsin ki, sakinlərin müəyyən hissəsi müvəqqəti olaraq köçürülsün. Binada aşkar olunmuş nöqsanlar aradan qaldırıldıqdan və binanın keyfiyyəti yenidən yoxlanıldıqdan sonra köçürülən sakinlər mənzillərinə qayıda biləcək”.

X.Nəcəfov həmçinin bildirib ki, ümumiyyətlə Bakıda yeni tikilmiş yaşayış binalarında müşahidə olunan problemlər onların mərtəbələrinin layihədə nəzərdə tutulmuşdan daha çox olması ilə bağlıdır. Baş Dövlət Tikinti Müfəttişliyinin rəhbəri qeyd edib ki, belə binaların bəzilərində bir neçə mərtəbə artıq sökülüb.