“Azərikimya” bələdçi, traktorçu, kran maşinisti axtarır

Yanvarın 16-da ARDNŞ-in “Azərikimya” İstehsalat Birliyinin kimya müəssisələrində nəqliyyat sahəsi üzrə işləmək arzusunda olan ali təhsilli gənc mütəxəssislərin və texniki işçilərin işə qəbulu üzrə müsabiqə keçiriləcək. Lent.az-ın ARDNŞ-in rəsmi saytına istinadən verdiyi məlumata görə, müraciət edənlər 3 bölmə üzrə, 5 ixtisas qrupunda sualları cavablandıracaqlar.

I bölmədə “Azərikimya”nın müəssisələrinin dalan dəmir yolları şəbəkəsində işləmək istəyənlər, II bölmədə kran maşinistləri və traktorçular, III bölmədə isə nəqliyyat üzrə mühəndislər bilik və təcrübə yarışmasına qatılacaqlar. Sınaq-yoxlama müsabiqəsi test üsulu ilə keçiriləcək. Hər bir iştirakçı daxil olduğu qrup üzrə 15-i ixtisas yönümlü, 10-u texniki təhlükəsizlik sahəsi üzrə olmaqla 25 suala cavab verəcəklər. İki mərhələ üzrə keçiriləcək müsabiqənin birinci mərhələsində müsabiqədən keçəcək iştirakçıların sayı yüzdən artıqdır.

İlkin mərhələdə müsbət nəticə əldə edənlər daha sonra “Azərikimya”nın nəqliyyat sahəsi üzrə təcrübəli mütəxəssislərindən təşkil olunmuş xüsusi komissiya və Sumqayıt şəhər Polis İdarəsinin Yol Polisi Şöbəsinin peşəkar əməkdaşları tərəfindən fərdi sınaq-yoxlama söhbətinə dəvət olunacaqlar. Hər iki mərhələdə müvəffəqiyyət əldə etmiş iştirakçılar “Azərikimya” İstehsalat Birliyi müəssisələrinin müvafiq sahələrində işlə təmin olunacaqlar.