DSMF-nin Ucar şöbəsi ən yaxşılar sırasında birincidir

Azərbaycan Həmkarlar İttifaqları Konfederasiyası “Sağlam və təhlükəsiz əmək şəraitinin yaradılması üzrə ilin ən yaxşı müəssisəsi (təşkilatı)” devizi ilə respublika müsabiqəsi keçirib.

Lent.az-ın məlumatına görə, dövlət idarəetmə orqanları arasında keçirilən qiymətləndirmə prosesi zamanı Dövlət Sosial Müdafiə Fondunun (DSMF) Ucar rayon şöbəsi ən yaxşı nəticə əldə edib. Bununla bağlı Fondun yerli şöbəsi Dövlət İdarələri və İctimai Xidmət İşçiləri Həmkarlar İttifaqı Respublika Komitəsi tərəfindən xüsusi Diplomla təltif olunub.

DSMF-nin mətbuat xidmətinin rəhbəri Elman Babayev Lent.az-a bildirib ki, müsabiqənin başlıca məqsədi insanların əmək şəraiti ilə maraqlanmaq, onlara normal iş şəraiti yaratmaq və sosial vəziyyətlərinin yaxşılaşdırılmasıdır. Onun sözlərinə görə, DSMF-nin Ucar rayon şöbəsində işçilər üçün müasir təhlükəsiz iş şəraiti yaradılıb. Şöbə yeni inzibati bina ilə təmin olunub. Yeni binada bütün iş yerləri müasir komputerlərlə, avadanlıqlarla və eləcə də mebellə təchiz edilmişdir ki, bu da rayon ərazisində yaşayan pensiyaçılara, həmçinin sahibkarlara yüksək səviyyədə xidmət göstərməyə imkan verir. Burada xüsusilə əmək pensiyaçılarına, ahıl vətəndaşlara xidmət imkanları genişləndirilib, müasir avadanlıqlar quraşdırılıb.

Elman Babayev bildirib ki, son illərdə həyata keşirilən kompleks tədbirlər nəticəsində DSMF-nin 70-dən yuxarı şöbəsində müasir kompüter infrastrukturu yaradılıb, Fondun bütün şöbələrində maddi-texniki baza və kadr potensialı gücləndirilib, bütün işçilər müasir kompüterlər sistemləri ilə təchiz ediliblər. DSMF-nin bütün şöbələri müxtəlif növ proqram təminatı ilə təmin ediliblər və hazırda əksər işlər kompüter sistemləri vasitəsi ilə aparılır. Onun sözlərinə görə, görülən işlərin nəticəsində DSMF-nin serverlərində unikal elektron məlumat bazaları yaradılıb ki, bu da Fondun işini keyfiyyətcə daha yüksək səviyyəyə qaldırır.

Elxan SALAHOV