Azərbaycanda qadın polislərin sayı arta bilər

Milli Məclisin payız sessiyasının bu gün keçirilən sonuncu iclasında bəzi qanunlara əlavə və dəyişikliklər edilib. Lent.az-ın məlumatına görə, dəyişikliklərdən biri Vergi Məcəlləsinə aiddir. Belə ki, Məcəllənin 102-ci maddəsinə edilən dəyişikliklə hakimlər gəlir vergisindən azad olunublar.

“Daxili işlər orqanlarında xidmət keçmə haqqında” əsasnaməyə edilən əlavələrə isə qadın polis əməkdaşlarının sosial hüquqlarının təmin edilməsi ilə bağlıdır. Həmin əlavəyə əsasən, qadın polis əməkdaşı hamiləliyə və doğuşa görə ödənişli, uşağın üç yaşı tamam olanadək ona bilavasitə qulluq etmək üçün qismən ödənişli sosial, habelə həkim məsləhət komissiyasının rəyi əsasında xroniki xəstəliyi olan uşağa qulluq etmək üçün uşaq 4 yaşına çatanadək əlavə ödənişsiz məzuniyyət almaq hüququna malikdir.

Əsasnaməyə edilən əlavədə qeyd olunur ki, qadın polis əməkdaşlarına hamiləlik və doğuşa görə məzuniyyətlər müvafiq tibb müəssisələrinin arayışı əsasında doğuşdan əvvəl 70 təqvim günü və doğuşdan sonra 56 təqvim günü müddətində verilir. Qadın polis əməkdaşına qismən ödənişli sosial məzuniyyət öz arzusu ilə tam və ya müəyyən müddətə hissələrə bölünməklə verilə bilər. Hamiləliyə və doğuşa görə məzuniyyət növbəti məzuniyyətin hesabına daxil edilmir. Qadın polis əməkdaşları öz arzusu ilə hamiləliyə və doğuşa görə məzuniyyətdən əvvəl, yaxud bilavasitə ondan sonra cari il üçün növbəti məzuniyyət verilir.

Bu dəyişiklik qadın polislərin sosial hüquqlarını təmin etməklə yanaşı zərif polis orqanlarında çalışan zərif cinsin nümayəndələrinin sayının artırılmasına xidmət etməlidir.

Elxan SALAHOV