BDU-da Elmi Şuranın iclası keçirilib - FOTO

BDU-nun mətbuat xidmətindən Lent.az-a bildiriblər ki, iclasda ali təhsil müəssisəsinin rəhbəri, akademik Abel Məhərrəmov 2010-cu ilin universitet üçün uğurlu olduğunu deyib. Rektor universitetdə yeni elmi strukturların yaranmasından, tədrisin keyfiyyətinin yaxşılaşdırılması istiqamətində bir neçə qurum fəaliyyətə başlamasından, habelə beynəlxalq əlaqələrin daha da genişləndirilməsi sahəsində çox ciddi işlərin görülməsindən danışıb. O qeyd edib ki, ölkə başçısının imzaladığı hər 3 sərəncamdan biri elm və təhsillə bağlı olub.

Tədbirdə tədris işləri üzrə prorektor, professor Vüsət Əfəndiyev gündəlikdəki məsələlərlə bağlı fikirlərini bölüşüb. Daha sonra Şura üzvlərini maraqlandıran suallar cavablandırılıb.

Elmi Şuranın iclasında 3 əsas məsələ üzrə qərar qəbul edilib: Qış imtahan sessiyasına hazırlıq, ingilis dilinin daha intensiv tədrisi və dünya iqtisadiyyatı fənni üzrə tədris proqramlarının yeniləşməsi. İclasda həmçinin bəzi alim və müəllimlərə elmi dərəcələrin verilməsi, Erməni Araşdırmaları Elmi Mərkəzi üçün daha geniş imkanların yaradılması barədə də qərar qəbul edilib.