“Qiyabi təhsil heç vaxt ləğv olunmayacaq”

“Mən düşünürəm ki, qiyabi təhsilin ləğvi heç vaxt olmayacaq. Sadəcə, məzmun yerində qalacaq, forma dəyişəcək”.

Bu sözləri APA-ya açıqlamasında Milli Məclisin Elm və təhsil komitəsinin üzvü, Bakı Dövlət Universitetinin rektoru Abel Məhərrəmov deyib.

Həmin formanın mahiyyətini açıqlayan millət vəkili deyib ki, qiyabi təhsil distant təhsil olacaq. A. Məhərrəmov bu yeniliyə görə narahatçılığa əsas görmədiyini də söyləyib: “Bu gün bir tələbənin iki təlim auditoriyası var. Birinci müəllimlə dialoqun olduğu auditoriya, ikincisi isə virtual universitet. Virtual universitetdən istifadə etmək qiyabiçilərə çox kömək edir. Məsələn, İngiltərənin Açıq Universitetində 90 mindən çox tələbə var. Onun 80 mini qiyabi, yəni distant təhsil alır. 10 min tələbə isə gündəlik olaraq auditoriyaya gedib-gəlir. Bu o deməkdir ki, gələcəkdə qiyabi təhsil formasının məzmunu qalmaqla, forması dəyişiləcək, distant təhsil olacaq. Ona görə də heç bir narahatlıq yoxdur”.