Ev və çöl quşlarının satışına qadağa qoyulub

Ötən gün rayon baytarlıq idarələrinə Kənd Təsərrüfatı Nazirliyi yanında Dövlət Baytarlıq Xidməti tərəfindən bazarlarda çöl və ev quşlarının diri və kəsilmiş halda satışına qadağa qoyulması barədə göstəriş verilib. Bu barədə Lent.az-a Xaçmaz və Qusar rayon baytarlıq idarələrindən məlumat verilib. Verilən informasiyaya görə, Kənd Təsərrüfatı Nazirliyi yanında Dövlət Baytarlıq Xidmətinin rəisi Siyalə Rüstəmova bu haqda sərəncam imzalayıb.

Qusar rayon Baytarlıq İdarəsinin rəisi Fəxrəddin İbrahimov Lent.az-a bildirib ki, bu gündən etibarən mütəmadi olaraq bazarlarda monitorinqlər keçiriləcək.

Kənd Təsərrüfatı Nazirliyi yanında Dövlət Baytarlıq Xidmətinin Mətbuat Xidmətinin rəhbəri Yolçu Xanvəlinin Lent.az-a verdiyi məlumata görə isə bu barədə müvafiq sərəncamın noyabr ayının 29-da imzalanıb. Əsas məqsəd quş qripinin yayılmasının qarşısı alınması üçün profilaktik tədbirlər görməkdir.

Vəli Turan