Azərbaycanda əlillik dərəcələri qrupla yox, faizlə ölçüləcək

Lent.az-ın verdiyi məlumata görə, bunu İctimai Televiziyaya müsahibəsində əmək və əhalinin sosial müdafiəsi nazirinin müavini Natiq Məmmədov söyləyib.

Qeyd edək ki, Azərbaycanda əlilliyin təyin olunma meyarları 1997-ci ildə Nazirlər Kabinetinin qərarı ilə təsdiq edilib. Onun sözlərinə görə, bəzi xəstəliklərlə bağlı əlilliyin təyin olunması meyarları da dəyişdirilə bilər. Hazırda bu yeniliklər araşdırma mərhələsindədir: “Hazırda elə xəstəliklər var ki, Azərbaycanda müalicə edilir və tam sağalma fazasına gəlib çatıb. Bu sırada müxtəlif somatik, göz, ürək-damar xəstəlikləri var. Dəyişikliklər əsasən ikinci qrupa aid ediləcək. Məqsəd əlillərin müdafiəsinin səmərəli təşkili və sağlamlıq imkanları məhdud olan belə insanları məşğulluqla təmin etməkdir”.

Natiq Məmmədov qeyd edib ki, ola bilər ki, hansısa insanlar öz peşələri ilə bağlı işləyə bilmirlər, amma əqli, fiziki cəhətdən sağlamdırlar və başqa peşələrdə işləyə bilərlər. Ona görə də ikinci qrup əlillər əsas götürülüb: “Yazırdıq ki, “əmək qabiliyyətsizdir”, “yaxud kənar şəxsin qulluğuna ehtiyac var”. Sözsüz ki, biz burada müəyyən dəyişikliklər edəcəyik”.

Nazir müavini bildirib ki, Azərbaycanda sağlamlığın itirilməsi əlillik qrupları ilə yox, bir sıra xarici ölkələrdə olduğu kimi faizlə ölçüləcək: “Bu, Dünya Bankı ilə Əmək və Əhalinin Sosial Müdafiəsi Nazirliyinin birgə həyata keçirdiyi “Sosial Müdafiənin İnkişafı” layihəsində nəzərdə tutulur. Hazırda bu məsələlər araşdırma mərhələsindədir. Bu sahədə yeniliklərin gələn il tətbiq olunması gözlənilir”.

Xatırladaq ki, 2011-ci ildə Azərbaycan hökumətinin əlillərin məşğulluğu ilə bağlı BMT-nin xüsusi komitəsində ilk məruzəsi dinlənəcək.