Şamaxıda 25 nəfər gözündən əməliyyat olunacaq

Mərkəzi Neftçilər Xəstəxanasının Göz Mərkəzinin həkimləri Şamaxıda humanitar aksiyaya start verib. Heydər Əliyev Fondunun təşəbbüsü, Azərbaycan Respublikası Dövlət Neft Şirkətinin (ARDNŞ) maliyyə dəstəyi ilə keçirilən aksiya çərçivəsində görmə problemi olan Şamaxı, Ağsu, Qobustan və İsmayıllı rayon sakinləri üzərində katarakta əməliyyatının aparılması nəzərdə tutulur.

ARDNŞ Sosial İnkişaf İdarəsi mətbuat xidmətinin rəhbəri Əmrah Fəqanoğlu Lent.az-a bildirib ki, əməliyyatlar yeni istifadəyə verilmiş Şamaxı Müalicə-Diaqnostika Mərkəzində aparılacaq. Onun sözlərinə görə, kataraktadan əziyyət çəkən göz xəstələri bir neçə ay əvvəl əməliyyat üçün Şamaxı Müalicə-Diaqnostika Mərkəzinə müraciət ediblər. Əməliyyata Şamaxıdan 15, Ağsudan 6, Qobustandan 2, İsmayıllıdan 2 sakin seçilib. Xəstələr əməliyyatdan 1 gün əvvəl lazım olan bütün müayinələrdən keçirilib və əks göstərişi olmayan xəstələr əməliyyata hazırlanıb.

Xəstələrdən 11-i dünən əməliyyat olunub və hazırda onların vəziyyəti qənaətbəxşdir. Bu gün isə qalan 14 nəfər əməliyyat olunacaq. ARDNŞ-nin Səhiyyə Departamentinin rəisi, tibb elmləri namizədi Fuad Əlizadə bildirib ki, Şamaxı Müalicə-Diaqnostika Mərkəzində katarakta əməliyyatlarının həyata keçirilməsi ilə bağlı aksiyanın davamlı olacaq.

Xatırladaq ki, katarakta (mirvari suyu) gözün büllurunun bulanmasıdır. Bu xəstəlik əsasən yaşlı qrupa aid olan xəstələri əhatə edir. Əməliyyatlar FAKO emosifikasiya üsulu ilə aparılır. Çıxarılan büllurun yerinə süni optik linzalar qoyulur.

Elxan SALAHOV