Daşkəsəndə ət emalı müəssisəsi açıldı

Daşkəsəndə əsas hissəsi Sahibkarlığa Kömək Milli Fondunun (SKMF) güzəştli kreditləri hesabına inşa olunmuş ət emalı müəssisəsi bu gündən fəaliyyətə başlayıb. İqtisadi İnkişaf Nazirliyinin mətbuat xidmətindən Lent.az-a bildiriblər ki, “Elba” MMC-yə məxsus müəssisə Almaniyanın “Banth”, “Bither” və “Seracold” şirkətlərinin istehsalı olan avadanlıqlarla təchiz olunub. İstehsal edilən məhsulların saxlanılması məqsədilə müəssisənin yaxınlığında tikilmiş tutumu 1000 ton olan soyuducu anbar kompleksi də istifadəyə verilib.

Ət emalı müəssisəsində bir iş növbəsi ərzində 65-70 baş iribuynuzlu, yaxud 150 baş xırdabuynuzlu heyvanların kəsilməsi, soyulması, təmizlənməsi, hissələrə ayrılması və emal bölməsinə daşınması, sifarişdən asılı olaraq, ət məhsullarının müxtəlif ölçülərdə və çeşidlərdə qablaşdırılması, saxlamaya göndərilməsi və digər proseslər tam avtomatlaşdırılıb. Nazirlikdə bildirirlər ki, müəssisə Daşkəsən və ətraf rayonlarda heyvandarlıqla məşğul olan təsərrüfatların inkişafını stimullaşdırmaqla yanaşı, əhalinin yüksək keyfiyyətli, sanitar-gigiyenik tələblərə cavab verən, ekoloji cəhətdən təmiz ət məhsulları ilə təminatına şərait yaradacaq.

Elxan SALAHOV