Ayıları və canavarları restoranlardan yığışdırırlar

Ekologiya və Təbii Sərvətlər Nazirliyi vəhşi heyvanların ayrı-ayrı istirahət mərkəzlərində qəfəslərdə saxlanılmasının qarşısını almaq məqsədilə Daxili İşlər və Vergilər Nazirliklərinin əməkdaşları ilə birgə 9 noyabrda növbəti reyd keçirib.

Lent.az-ın Ekologiya və Təbii Sərvətlər Nazirliyinin rəsmi saytına istinadən verdiyi məlumata görə, keçirilmiş reydlər zamanı Bakı şəhəri Səbail rayonu ərazisində yerləşən “Qurd qapısı” restoranında 1 ədəd ayının, Lerik rayonu ərazisində yerləşən istirahət mərkəzində isə 3 ədəd ayının və 1 ədəd canavarın qəfəsdə saxlanılması aşkar edilərək qanunvericilikdə nəzərdə tutulmuş qaydada sənədləşdirilib.

Müsadirə olunmuş 4 ədəd ayı Altıağac Milli Parkının nəzdində fəaliyyət göstərən Vəhşi Təbiətin Bərpası Mərkəzi və Reabilitasiya Klinikasına göndərilib, 1 ədəd canavar isə Hirkan Milli Parkının ərazisində təbiətə buraxılıb.

Bütün hallarda qanunu pozmuş şəxslər Azərbaycan Respublikasının “Heyvanlar aləmi haqqında” qanununamüvafiq olaraq inzibati qaydada məsuliyyətə cəlb edilərək cərimə olunublar. Hazırda respublika ərazisində bu kimi reydlər davam etdirilir.