14 mağazada yararsız məhsul aşkar olunub - SİYAHI

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin ticarət mərkəzlərində apardığı monitorinqlərin nəticəsini açıqlayıb. Bu dəfə yoxlamalar Bakı şəhərini və Quba rayonunu əhatə edib.

Nazirliyin mətbuat xidmətindən Lent.az-a bildiriblər ki, monitorinq zamanı 14 mağazanın hər birində istifadə müddəti ötmüş yararsız məhsullar aşkarlanıb. Mağazaların böyük əksəriyyəti yenə də paytaxt Bakının payına düşür. Həmin mağazaları bunlardır:

Bakının Biləcəri qəsəbəsində
- R.İsmayılov küçəsi, ev 6C ünvanında yerləşən “Sənan market”də;
- N.Həşimi küçəsindəki “Samir market”də və Zöhrab Həsənova məxsus mağazada;
- Q.Süleymanov küçəsində yerləşən “Sara market”də, Nəcibə Mahmudovaya və Gilas Məmmədovaya məxsus mağazalarda;

Yasamal rayonunda
- Z.Əhmədbəyov küçəsi, 30 ünvanında yerləşən “Banu market”də;
- N.Nərimanov prospekti, ev 70 ünvanındakı“Çempion market”də;
- Ə.Ələkbərov küçəsi,13 B ünvanında yerləşən “Toto market”də;
- Şərifzadə prospekti, 190 ünvanında Rövşən Rəhimova məxsus mağazada;
- Şərifzadə küçəsi, ev 80 ünvanındakı “Dost market”də;
- N.Hikmət küçəsi, 24 ünvanında yerləşən “Real market”də;

Xətai rayonunda
- M.Hadi küçəsi ilə X.Məmmədov küçəsinin kəsişməsində yerləşən “Yeni market”də və Zahid İsgəndərova məxsus mağazada;
- M.Hadi küçəsi, ev 70, giriş 1 ünvanındakı “Lyuks market”də;
- A.Cəlilov küçəsində yerləşən “400 market”, “Sizin market”də və Oktay Mehtiyevə məxsus mağazada;
- Y.Şərifov küçəsi, 10/3 ünvanında yerləşən “Dübəndi market”də;

Quba rayonunda
- Paşa-oba kəndində Maxsud Cəbrayılova məxsus mağazada.

Monitorinq zamanı ümumi çəkisi 532 kiloqram olan saxlama müddəti ötmüş və etiketlənməsi normativ-texniki sənədlərin tələblərinə uyğun olmayan ərzaq məhsulları satışdan çıxarılıb. Kolbasa məmulatları, makaron və un məmulatları, süd və süd məhsulları, qənnadı məmulatları, bal, yağlar, konservləşdirilmiş məhsullar, quru meyvələr, pivə, mineral sular, sərinləşdirici içkilər, şirələr, uşaq yeməkləri və digər məhsullardan ibarət saxta məhsulların hamısı məhv edilib.

Elxan SALAHOV