Baş pediatr: “Özəl tibb müəssisələrində doğuşun əleyhinəyəm”

Bunu APA-ya açıqlamasında respublikanın baş pediatrı Nəsib Quliyev deyib. Baş pediatrın sözlərinə görə, köklü ənənələrə malik, hazırda təchizatı və təminatı yüksək səviyyədə olan dövlət tibb müəssisələrinin həm yükü, həm də gördüyü iş özəl klinikalardan fərqlənir. N. Quliyev özəl tibb müəssisələrində doğuşların əleyhinə olduğunu da bildirib: “Şəxsən mən özəl tibb müəssisələrində doğuşa yardımın tərəfdarı deyiləm. Bəzi özəl tibb müəssisələri hətta yaşayış binalarının aşağı mərtəbəsində uyğunlaşdırılmış şəraitdə doğuş qəbul edir”.

Mütəxəssisin sözlərinə görə, əslində Səhiyyə Nazirliyinin tərtib etdiyi qaydalarda bu məsələ tənzimlənib, doğuşa yardım xidmətində səviyyələr müəyyən edilib: “Özəl tibb müəssisələrinin yalnız normal doğuşları qəbul etmək imkanı var. Doğuşda, hamiləlikdə risk olan bütün hallarda isə hamilələrin dövlət tibb müəssisələrində yerləşməsi tövsiyə olunur”.

Tələblərə cavab verməyən özəl tibb müəssisələrinin fəaliyyətinə gəldikdə, baş pediatrın bu məsələnin nazirlik tərəfindən tənzimləndiyini qeyd edib: “Həmin müəssisələrin lisenziyası alınır, onlar qayda-qanuna dəvət olunurlar. Əminəm ki, çox qısa zamanda bu məsələlər həllini tapacaq”.