Həftəsonu qar yağacaq

Oktyabrın 22-si axşamdan həftənin sonunadək ölkə ərazisində hava şəraitinin qeyri-sabit keçəcəyi, şimşək çaxacağı arabir yağış yağacağı gözlənilir.

Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin APA-ya verdiyi məlumata görə, temperatur tədricən enəcək, arabir güclənən şimal-qərb küləyi əsəcək

Bakı və Abşeron yarımadasında oktyabrın 22-də günün birinci yarısında havanın tutulacağı, bəzi ərazilərdə zəif duman, çiskin olacağı, axşama doğru yarımadanın bəzi yerlərində qısamüddətli az yağış yağacağı ehtimalı var. Cənub küləyi günün ikinci yarısında şimal-qərb, şimal küləyi ilə əvəz olunacaq, axşama doğru arabir güclənəcək. Günün birinci yarısında 20-23, axşama doğru 15 dərəcəyədək isti olacaq.

Oktyabrın 23-də havanın tutulub açılacağı, yarımadanın bəzi yerlərində qısamüddətli az yağış yağacağı ehtimalı var. Şimal-qərb küləyi əsəcək, gecə və səhər arabir güclənəcək, axşam mülayim şimal-şərq küləyi əsəcək. Gecə 12-14, gündüz 15 dərəcə isti olacaq.

Oktyabrın 24-də havanın tutulub açılacağı, yarımadanın bəzi yerlərində qısamüddətli yağış yağacağı ehtimalı var. Şimal, şimal-şərq küləyi əsəcək. Havanın temperaturu gecə 11-13 dərəcə isti, gündüz 15 dərəcəyə yaxın olacaq.

Oktyabrın 25-də hava dəyişkən buludlu, əsasən yağmursuz keçəcək. Şimal-şərq küləyi əsəcək. Havanın temperaturu gecə 12-14, gündüz 15-18 dərəcə isti olacaq.

Azərbaycanın rayonlarında oktyabrın 23-də şimşək çaxacağı, arabir yağış yağacağı gözlənilir. Əsasən, şimal və şərq rayonlarında yağıntıların intensiv olacağı, gecə saatlarında yağışın yüksək dağlıq ərazilərdə sulu qara, qara keçəcəyi ehtimalı var. Qərb küləyi əsəcək, ayrı-ayrı yerlərdə arabir güclənəcək. Havanın temperaturu gecə 11-14, gündüz 15-18, dağlarda gecə 3-8, gündüz 8-11 dərəcə isti olacaq.

Oktyabrın 24 və 25-də şimşək çaxacağı, arabir yağış yağacağı gözlənilir. Oktyabrın 24-də bəzi yerlərdə intensiv olacağı, yağışın yüksək dağlıq ərazilərdə sulu qara, qara keçəcəyi ehtimalı var. Qərb küləyi əsəcək, arabir güclənəcək. Havanın temperaturu gecə 10-14, gündüz 15-18, dağlarda gecə 2-6, gündüz 6-9, yüksək dağlıq ərazilərdə gecə və gündüz 0 dərəcəyə yaxın olacaq.