Biləsuvarda Mübariz İbrahimov adına lisey-məktəb kompleksi açıldı

Lisey-məktəb kompleksi Azərbaycan Mərkəzi Bankının dəstəyi ilə qurulub.

Mərkəzi Bankın mətbuat xidmətindən Lent.az-a bildiriblər ki, ümumi sahəsi 1,3 hektar olan təhsil kompleksində müasir işıqlandırma, havalandırma, isitmə-soyutma sistemləri, su təmizləyici qurğu quraşdırılıb. Liseydə 28 sinif otağı (müəllimlər otağı, fənn kabinetləri, laboratoriyalar, kompüter zalı), idman və rəqs (ritmika) zalları fəaliyyət göstərir. Hazırda Biləsuvar lisey-məktəb kompleksində 107 şagird təhsil alır, növbəti dərs ilindən onların sayının 250-300 nəfərə çatacağı gözlənilir.

Açılış mərasimində Biləsuvar Rayon İcra Hakimiyyətinin başçısı Adil Məmmədov, deputat Xanhüseyn Kazımlı, Milli Qəhrəman Mübariz İbrahimovun atası Ağakərim İbrahimov çıxış ediblər. Çıxışçılar təhsil siteminin keyfiyyətini artırmaq məqsədi ilə liseydə ödənişsiz təhsil, lisey geyim forması və gündə iki dəfə isti yeməklə pulsuz təminat, aztəminatlı uşaqlara yardım məqsədi ilə xüsusi lisey fondu, 5-40 kilometr məsafədə yaşayan şagird və müəllimlərin xüsusi avtobuslarla daşınması təşkil olunduğunu söyləyiblər.

“Beynəlxalq təhsil standartlarına cavab verən məktəb-lisey kompleksinin açılmasında məqsəd şagirdlərə milli və bəşəri dəyərləri, vətəndaşlıq şüurunu aşılamaq, hər bir şagirdin şəxsiyyətini və yaradıcı potensialını inkişaf etdirmək, müstəqil həyata hazır intellektuallar yetişdirmək və liderlik keyfiyyətlərini təlqin etdirməkdən ibarətdir” - deyə, Elman Rüstəmov mərasimdəki çıxışında bildirib.

Xatırladaq ki, Mübariz İbrahimov 2010-cu il iyunun 18-də Tərtərin Çaylı kəndi istiqamətində Ermənistan silahlı qüvvələrinin hücumunu dəf edərkən düşməni ağır itkilərə məruz qoyaraq qəhrəmancasına həlak olub. Şəhid gizirin meyiti o vaxtdan ermənilərin əlindədir. İyulun 22-də prezident İlham Əliyev Azərbaycanın müstəqilliyinin və ərazi bütövlüyünün qorunub saxlanmasında müstəsna xidmətinə və göstərdiyi rəşadətə görə gizir Mübariz Ağakərim oğlu İbrahimova Azərbaycanın Milli Qəhrəmanı adı verilməsi (ölümündən sonra) barədə sərəncam imzalayıb. Dövlət başçısının həmin gün imzaladığı başqa bir sərəncam isə Mübariz İbrahimovun xatirəsinin əbədiləşdirilməsi haqqında olub. Sərəncamda Biləsuvar rayonunda orta məktəblərdən və küçələrdən birinə Mübariz İbrahimovun adının verilməsini tapşırılıb.