İsmət Abbasov: “Çörəyin qiymətinin qalxmasına əsas yoxdur”

Lent.az-ın məlumatına görə, bu barədə kənd təsərrüfatı naziri İsmət Abbasov jurnalistlərə açıqlamasında bildirib. O, qeyd edib ki, hazırda ölkədə kifayət qədər taxıl var, həmçinin bu il Fövqəladə Hallar Nazirliyinin Taxıl Ehtiyatı Fondunda da xeyli taxıl ehtiyatı toplanılıb. Nazir qeyd edir ki, əgər qış aylarında fermerlərin əlindəki və sahibkarların gətirdiyi taxılın həcmi azalarsa və qiymət qalxarsa, Fondda toplanmış ehtiyat bazara buraxılacaq və bununla da çörək və unun bahalaşmasına imkan verilməyəcək. Bununla belə, Abbasov bildirdi ki, nazirlik çörək və unun qiymətinə təsir etmək imkanına malik deyil: “Biz bazara müdaxilə etmək istəmirik. Buna bizim hüquqi səlahiyyətimiz də yoxdur. Qiymətləri başqa dövlət orqanları tənzimləyir. Lazım gələrsə, onlar bu məsələyə müdaxilə edə bilərlər”.

İsmət Abbasov onu da vurğulayıb ki, hazırda bəzi bölgələrdə çörəyin və unun qiymətinin qalxması barədə məlumatlıdır. Amma o hesab edir ki, çörəyin qiymətinin qalxması süni xarakter daşıyır. Nazirin sözlərinə görə, hazırda nə Bakıda nə də rayonlarda çörəyin qiymətinin qalxmasına heç bir əsas yoxdur.

Elxan Salahov