Zabrat qaza həsrət qalıb

Təxminən 15 gündən çoxdur ki, Bakının Sabunçu rayonunun Zabrat qəsəbəsində qaz təchizatı ciddi şəkildə məhdudlaşdırılıb. Ərazidə qazın təzyiqi aşağı olduğundan əhali bu yanacaqdan istifadə edə bilmir. Sakinlər bunun səbəbi, bu vəziyyətin nə vaxtadək davam edəcəyindən xəbərsiz və narahatdırlar.

Məsələyə aydınlıq gətirmək üçün Sabunçu rayon Qaz İstismarı İdarəsi ilə əlaqə saxladıq. İdarədən Lent.az-a faktlı təsdiq edərək bildiriblər ki, bu vəziyyət təkcə Zabratda deyil, rayonun digər iri yaşayış massivlərinə, Maştağada və Balaxanıda da yaşanır. Səbəb “Azəriqaz” İstehsalat Birliyinin qaz təchizatını bəzi ərazilərdə dayandırması ilə bağlıdır. Hazırda Sabunçu rayonuna verilən qazın təzyiqi aşağı olduğundan Balaxanı, Zabrat 1, Zabrat 2, Maştağa və digər qəsəbələrdə təbii yanacaq çatışmazlığı problemi müşahidə olunur.

Bununla belə, idarədə bildiriblər ki, bu gün axşam və ya sabah qaz təchizatının bərpa olunacağı gözlənilir. Həmçinin Zabrat qəsəbəsində köhnəlmiş əsas qaz xətlərinin, o cümlədən qəsəbənin bəzi ərazilərində məhəllədaxili boruların yenisi ilə əvəz edilməsi işləri də artıq başa çatıb. Bu gün həmin xətlərin sınaqdan keçirilməsinə başlanıb. Sınaq işləri başa çatdıqdan sonra Zabratın təbii qaz təchizatındakı məhdudiyyətlər tamamilə aradan qaldırılacaq.

Elxan SALAHOV