“Ailə həkimi haqqında” qanunumuz olacaq

Milli Məclisin sosial siyasət komitəsi “Ailə həkimi haqqında” qanun layihəsi hazırlayır.

Lent.az-ın məlumatına görə, növbəti sessiyada qanun layihəsinə baxılması nəzərdə tutulub. Layihənin hazırlanmasında əsas məqsəd vətəndaşlara lazımı tibbi xidmət və ailələri ilkin həkim nəzarəti ilə təmin etməkdir.

“Ailə həkimi haqqında” qanun layihəsi əsasən regionlarda, xüsusən də ucqar kənd yerlərində yaşayan insanların tibbi nəzarətdə saxlanılması üçün vacib hesab olunur. Layihənin təkmil formada hazırlanması üçün Azərbaycan Tibb Universitetinin “Ailə təbabəti” kafedrası mütəxəssisləri də iştirak edir.

Xatırladaq ki, bu ildən etibarən Tibb Universitetində tətbiq olunacaq rezidentura qaydaları da ailə həkimi kadrlarının hazırlanması işinin sürətləndirilməsini nəzərdə tutur. Üstəlik səhiyyə naziri ötən il “Azərbaycan Respublikası səhiyyə müəssisələrində istifadə olunan ixtisasların və vəzifələrin nomenklaturası haqqında” əmr imzalayıb. Əmrə əsasən, bu siyahıya ilk dəfə olaraq “ Ailə həkimi” vəzifəsi də daxil edilib.

Elxan SALAHOV