Təhsilə daha 4 milyon manat ayrıldı

Azərbaycan Prezidenti İlham Əliyev “Azərbaycan Respublikasında məktəbəqədər təhsilin yeniləşdirilməsi proqramı 2007-2010-cu illər” və “ Azərbaycan Respublikasında texniki-peşə təhsilinin inkişafı üzrə dövlət proqramı 2007-2012-ci illər” nəzərdə tutulmuş tədbirlərin icrasını sürətləndirmək məqsədilə sərəncam imzalayıb.

Prezidentin mətbuat xidmətindən Lent.az-a verilən məlumata görə, sərəncamda qeyd olunur ki, məktəbəqədər təhsil müəssisələrinin əsaslı təmiri üçün 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Təhsil Nazirliyinə 2 milyon manat və ilk peşə ixtisas təhsili müəssisələrinin əsaslı təmiri üçün 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Təhsil Nazirliyinə 2 milyon manat vəsait ayrılsın.

Maliyyə Nazirliyinə bu vəsaitlərin maliyyələşdirilməsini təmin etmək, Nazirlər Kabinetinə bu sərəncamdan irəli gələn digər məsələləri həll etmək tapşırılır.