Azərbaycan prezidenti əsaslı təmir edilmiş məktəb kompleksinin açılışında iştirak edib

Lent.az-ın “AzərTAc” agentliyinə istinadən verdiyi məlumata görə, mərasimdə Azərbaycan Respublikası prezidenti İlham Əliyev də iştirak edib.

Dövlət başçısı müasir standartlara uyğun əsaslı surətdə yenidən qurulmuş təhsil kompleksi ilə tanış olub.

Məlumat verilib ki, prezidentin xüsusi tapşırığı ilə əsaslı şəkildə yenidən qurulan dördmərtəbəli təhsil kompleksində həm müəllimlərin yüksək səviyyədə fəaliyyəti, həm də şagirdlərin biliklərin əsaslarına mükəmməl yiyələnmələri üçün hər cür şərait yaradılıb. Şagirdlərin də, müəllimlərin də açılışını səbirsizliklə gözlədikləri bu bilik ocağında keyfiyyət, müasirlik və yüksək zövq vəhdət təşkil edir. İndi bu məktəb maddi-texniki bazasının zənginliyinə görə ölkəmizdə müasir təhsil komplekslərindən birinə çevrilib. Xalqımızın maarifləndirilməsində, Azərbaycan elminin inkişaf etdirilməsində böyük xidmətləri olmuş yüzlərlə alimə ilk savad vermiş bu təhsil ocağında bu gün minədək şagirdin təlim-tərbiyəsi ilə 110 müəllim məşğuldur.

Prezident İlham Əliyev təhsil kompleksində yaradılmış Heydər Əliyev Muzeyinə, fənn kabinetlərinə, idman, akt zallarına, tarix muzeyinə, ayrı-ayrı sinif otaqlarına, bufetə baxıb, tədris prosesi, dərs vəsaitləri, təhlükəsizlik sistemi ilə maraqlanıb.

Dövlət başçısı təhsil kompleksi nəzdində fəaliyyət göstərən uşaq bağçası ilə də tanış olub.
Kompleksdə gözəl şərait yaradıldığını bildirən prezident İlham Əliyev yeni dərs ilinin başlaması münasibətilə məktəbin müəllimlərini və şagirdlərini təbrik edib, onlara uğurlar arzulayıb.

Dövlət başçısına təhsil kompleksinin müəllimi Ülkər Hüseynovanın müəllifi olduğu “Mənim fəxrim – məktəbim!” kitabı təqdim olunub.