Diqqət! Bu gecə saatlarınızı irəli çəkməyi unutmayın!

Budəfəki “irəliçəkmə”nin maraqlı özəlliyi var
Sabah - martın 29-u saat 05:00-da Azərbaycanda saatlar 1 saat irəli çəkilməklə yay vaxtına keçiləcək. Lent.az-ın məlumatına görə, bu dəfə saatların irəli çəkilməsi hadisəsi əvvəlki illərdən bir özəlliyi ilə fərqlənəcək. Belə ki, saatlar martın sonuncu həftəsinin şənbə günündən bazar gününə keçən gecəsi səhərə yaxın 1 saat irəli çəkilir. Əvvəlki illərdə insanlar saatları geri, yaxud irəli çəkməsindən asılı olmayaraq bazar gününü evdə keçirdiklərindən bazar ertəsinə – növbəti iş gününə qədər saatlarını tam qaydaya salırdılar; yəni saatın 1 saat irəli çəkilməsi yaddan çıxsaydı belə, onu tənzimləmək üçün ehtiyatda 1 gün – istirahət günü sayılan bazar günü - vaxt olurdu. Lakin Nazirlər Kabinetinin bu il imzalanmış qərarına əsasən, martın sonuncu həftəsinin bazar günü – martın 29-u iş günü olduğundan insanların saatı tənzimləmək üçün ehtiyat vaxtları olmayacaq. Ən yaxşısı, saatı axşamdan irəli çəkməkdir.
Xatırladaq ki, qış və yay vaxtlarının tətbiqi qərarı 1997-ci ildə verilib. Qərara əsasən, hər il oktyabrın son bazar günündə ölkə ərazisində qış, martın son bazar günündə isə yay vaxtına keçilir.
Pərvin ABBASOV