Gəncədə nəhəng Novruz paxlavası kəsildi

Heyrətamiz şirniyyatın dadına Ginnesin Rekordlar Kitabının nümayəndələri də baxıblar
Bu gün Gəncənin baş meydanında Novruzun gəlişi ilə bağlı bayram şənliyi keçirilib. Lent.az-ın Gəncəbasar müxbirinin verdiyi məlumata görə, meydanın mərkəzində uzunluğu 12 metr, eni 4 metr, çəkisi 3 ton olan bayram paxlavası, üzərində Gəncənin simvolu olan böyük səməni bayram şənliyinə gözəllik qatıb. Yağış yağmasına baxmayaraq, bayram tədbirinə yüzlərlə insan qatılıb.
Gəncə şəhər İcra Hakimiyyəti başçısı Eldar Əzizov başda olmaqla şəhər əhalisi Gəncənin şirniyyat ustaları tərəfindən hazırlanan nəhəng Novruz şirniyyatının dadına baxıb. 10 günə hazırlanan paxlavaya 7000 ədəd yumurta, 550 kq şəkər tozu, 500 kq un, 360 kq yağ, 300 kq qoz, 200 lt süd, 20 kq badam, 10 kq bal, 5 kq küncüt, 5 kq zəfəran sərf olunub.
Nəhəng paxlavanın dadına böyük bayram şirniyyatının rekordlar kitabına salınması üçün Gəncəyə dəvət olunan Ginnesin Rekordlar kitabının MDB üzrə nümayəndələri Aleksey Stistunov və İqor Ximtsov da baxıb.
Tədbir Elza Seyidcahanın ifasında konsert proqramı ilə davam edib.
Gəncə şəhər İcra Hakimiyyətindən verilən məlumata görə, bundan sonra Gəncə Dövlət Universitetinin qarşısında yarmarka-şou fəaliyyətə başlayacaq.
Vüsalə Cənnətova