Direktorlar Təhsil Nazirliyinə çağırılıb

Qapalı müşavirədə sınaq imtahanlarının nəticələri müzakirə olunacaq

Yaxın dəqiqələrdə Təhsil Nazirliyində Bakı şəhərindəki orta məktəblərin direktorlarının iştirakı ilə müşavirə keçiriləcək.

Lent.az-ın məlumatına görə, yalnız məktəb direktorlarının və Bakı Şəhəri üzrə Təhsil İdarəsinin rəhbər işçilərinin iştirak etdiyi müşavirə qapalı keçirilir. Jurnalistlər bu tədbirə dəvət olunmayıb.

Əldə etdiyimiz məlumatlara görə, müşavirədə bazar günü orta məktəblərdə keçirilmiş sınaq imtahanlarının nəticələri müzakirə olunacaq. İmtahanın ümumi yekunlarına əsasən, zəif nəticə göstərmiş məktəblərin rəhbərlərinə nöqsanları aradan qaldırmaq üçün müvafiq göstərişlər veriləcəyi bildirilir.

Müşafirədə həmçinin məktəb direktorlarının müavinlərindən birinin informasiya-kommunikasiya texnologiyaları üzrə mütəxəssis olması barədə nazirliyin qərarının icra vəziyyəti barədə fikir mübadiləsi aparılacaq.

Elxan SALAHOV