“Qeyrət qalası” və “Cənub xəbərləri”nə xəbərdarlıq edildi

Bu gün Mətbuat Şurasının Şikayətlər üzrə Komissiyasının iclası keçirilib. Şuradan Lent.az-a verilən məlumata görə, Mətbuat Şurası sədrinin müavini Müşfiq Ələsgərlinin başçılıq etdiyi komissiyanın üzvləri 6 müraciəti araşdırıb.

Əvvəlcə Ağdam rayonu Quzanlı qəsəbəsinin bir qrup sakininin “Qeyrət qalası” qəzeti ilə bağlı şikayətinə baxılıb. Komissiya həmin mətbu nəşrdə gedən bir sıra yazılarda açıq təhqirlərə yol verildiyini, bunların əsasən fərdi baxışlardan, münasibətlərdən qaynaqlandığını əsas götürərək “Qeyrət qalası” qəzetinə Mətbuat Şurası tərəfindən xəbərdarlıq edib.

İclasda üç kütləvi informasiya vasitəsinin adının Mətbuat Şurasının “qara siyahı”sına salınması üçün nə dərəcədə əsaslar olduğunun müəyyənləşdirilməsinin Şuranın “Reket jurnalistika”ya qarşı mübarizə Komissiyasına həvalə edilməsi barədə də razılığa gəlinib. Bunlar “Vedi inform”, “Həftəlik Azərbaycan”, və “Azad yeni fikir” qəzetləridir.

“Vedi inform” barədə belə rəyə gəlinərkən Respublika Dəri-Zöhrəvi Dispanserinin, Şəki Şəhər Qarışıq Tipli Uşaq Evinin şikayətləri və digər amillər nəzərə alınıb. Digər iki qəzet barədə ölçü götürülərkən Göyçay rayon sakinləri Eldar Şıxəliyevin və İlkin Nəbiyevin müraciətlərindəki məqamlara istinad edilib.

İclasda “Cənub xəbərləri” qəzeti barədə müraciətlərlə əlaqədar iki rəy çıxarılıb. Komissiya Yardımlı Rayon Mədəniyyət Şöbəsinin bu mətbu nəşrlə bağlı şikayətini əsaslı saymayıb. Nəzərə alınıb ki, müraciətdə adı çəkilən qəzet əməkdaşının məhkəmə hökmü ilə şöbənin tabeliyindəki əsas iş yerinə qaytarılması qarşı tərəfin iddiasını qüvvədən salır. Masallı rayonundan bir qrup ziyalının müraciətinin müzakirəsi isə “Cənub xəbərləri”nə xəbərdarlıq olunması ilə yekunlaşıb. Nəşr rəhbərliyinə bildirilib ki, qəzetdə etik çərçivəyə sığmayan təhqiramiz fikir və ifadələrin işlədilməsi yolverilməz haldır. Bu KİV-də belə hallar aradan qaldırmalıdır.