Milli Qəhrəman haqqında yeni müsabiqə başlayır

“Kaspi” qəzeti Milli Qəhrəman Mübariz İbrahimovun xatirəsinə həsr olunmuş vətənpərvərlik mövzusunda bədii əsər və publisistik yazı müsabiqəsi elan edir.

Lent.az-ın məlumatına görə, yazı müsabiqəsinin əsas məqsədi Mübariz İbrahimovun xatirəsinin əbədiləşdirilməsinə töhfə vermək və vətənpərvərlik mövzusunu geniş yaradıcı ictimaiyyətin diqqətində saxlamaqla kütləviləşdirməkdir.

Müsabiqədə birinci yer üçün 1000, ikinci yer üçün 500, üçüncü yer üçün 300 manat məbləğində mükafat müəyyənləşdirilib. Həmçinin hər biri 200 manat olmaqla 5 həvəsləndirici mükafatın verilməsi nəzərdə tutulub.

Müsabiqəyə hekayələr, şeirlər və publisistik məqalələr qəbul olunur. Həcmə görə məhdudiyyət yoxdur. Əsərlər yalnız vətənpərvərlik mövzusunda yazılmalıdır. Çap olunmuş əsərin “Kaspi” qəzeti redaksiyasına təqdim olunmalıdır. Materiallar poçt vasitəsi ilə də göndərilə bilər. Yazılar dekabrın 31-dək qəbul olunur. Nəticələr fevralın 7-də Mübariz İbrahimovun ad günündə keçirilən təntənəli tədbirdə açıqlanacaq.

Elxan SALAHOV