Müəllimlərin sentyabr konfransı başlayır

Təhsil Nazirliyindən Lent.az-a verilən məlumata görə, “Gülüstan” sarayında təşkil olunacaq konfransda Prezident Administrasiyasının rəhbəri Ramiz Mehtiyev, şöbə müdiri Fatma Abdullazadə, ali və orta ixtisas məktəblərinin rəhbərləri də iştirak edəcək. Konfransda 2010-2011-ci tədris ilində qarşıda duran vəzifələr müzakirə ediləcək, mövcud vəziyyəti təhlil olunacaq və təkliflər səsləndiriləcək.

Sentyabr ayının 6-da isə “Hyatt Recency” otelində Bakı şəhəri təhsil işçilərinin ənənəvi sentyabr konfransı təşkil olunacaq. Bakı məktəblərində çalışan müəllimlərin konfransı plenar və bölmə hissələrindən ibarət olacaq. İlk gün plenar iclası keçirilən konfransın bölmə iclasları sentyabr ayının 7-də Bakının 19 məktəbində baş tutacaq. Bütün məktəblərin qabaqcıl müəllimlərinin cəlb olunduğu bölmə iclasları Bakının 20, 190, 106, 139, 211, 54, 276, 3. 181, 96, 107, 138, 279, 95, 285, 258, 36, 214, 210 saylı məktəblərində təşkil ediləcək.

Elxan SALAHOV