Etilen-polietilen zavodunda mülki müdafiə üzrə təlim keçiriləcək

Sentyabrın 3-də “Azərikimya” İstehsalat Birliyinin Etilen-polietilen zavodunun ərazisində Fövqəladə Hallar Nazirliyi qüvvələrinin mülki müdafiə üzrə təlimi keçiriləcək.
Lent.az-ın ARDNŞ-in rəsmi saytına istinadən verdiyi məlumata görə, təlimin keçirilməsində əsas məqsəd fövqəladə hadisələr zamanı birgə və səmərəli fəaliyyəti təşkil etməkdir.

Zavodun hərbiləşdirilməmiş mülki müdafiə heyətinin və Fövqəladə Hallar Nazirliyinin mühafizə xidmətinin 200 nəfərlik qüvvəsinin iştirak edəcəyi təlimə 10-dan artıq yanğınsöndürən maşın və texnika cəlb olunacaq. Artıq “Azərikimya”da təlimlə bağlı hazırlıq işləri yekunlaşıb. Təlim üçün stasionar yanğınsöndürmə, rabitə-xəbərdarlıq qurğuları hazırlanıb, su təchizatı, mülki müdafiə dəstələrinin xüsusi geyim, dəbilqə və s. ləvazimatlarla təminatı məsələləri həll olunub, iştirakçılara metodiki tövsiyələr verilib.

Təlimdə Fövqəladə Hallar Nazirliyinin xüsusi komissiyası, Sumqayıt şəhər Mülki Müdafiə Qərargahının, Respublika “Qızıl Aypara” Cəmiyyəti Sumqayıt şəhər şöbəsinin nümayəndələri iştirak edəcəklər. Sumqayıt şəhər təcili tibbi-yardım stansiyasının həkimlər briqadası təlim keçirilən müddət ərzində zavodun ərazisində növbə çəkəcək.