ŞOK! Su basmış evlərdə yaşayanlar var!

Ölkənin fəlakət bölgəsində evləri hələ də su içində olan sakinlərdən bəziləri həmin evlərində yaşamaqdadır. Sabirabad rayonunun Yuxarı Axtaçı kəndinin sakini Aydın Muxtarov Lent.az-a bildirib ki, onun ikimərtəbəli evinin birinci mərtəbəsinin təxminən yarısı suyun içindədir. Buna baxmayaraq o, 10 gündən artıqdır ki, evdə yaşayır. Ailə üzvlərini qonşuluqdakı Kürdəmir rayonunun Axtaçı-Qarabucaq kəndində yerləşdirmiş bu şəxs gündüz vaxtı özünə məxsus kiçik qayıqla kəndin su basmış yerlərini gəzir, qonşu kənddə yaşayan qohumlarından ərzaq alır, yenidən kəndə qayıdır, axşamlar evinin ikinci mərtəbəsinə çıxıb, orada yatır.

A.Muxtarov Yuxarı Axtaçı kəndində təxminən 200 ev olduğunu, lakin kənddə hazırda 20-yə yaxın şəxsin yaşadığını bildirib. Bunlar əsasən ikimərtəbəli evi və qayığı olanlardır.

Yuxarı Axtaçı kəndini Sarısu gölünə vurulmuş bənd dağılarkən sel basıb. Hazırda kənddə iki metrə yaxın hündürlükdə su var.

A.Muxtarovun Lent.az-a təqdim etdiyi görüntülərdə bir itin daşların üstünə çıxdığı da görünür. Hər tərəfi su basdığından, heyvancığaz canını bu cür qurtarmaq istəyib.

Pərvin ABBASOV