Bakı və Sumqayıtda istifadəyə yararlı çimərliklər - SİYAHI

Azərbaycan Ekologiya və Təbii Sərvətlər Nazirliyi Xəzərdə yararlı çimərliklərin adlarını açıqlayıb

Azərbaycan Ekologiya və Təbii Sərvətlər Nazirliyi may-iyun aylarında Xəzər dənizinin sahilində təmizləyici qurğuların quraşdırıldığı ərazilərdə, eləcə də digər çimərlik sahələrində aparılan mikrobioloji təhlillərin nəticələrini açıqlayıb.

Nazirliyin mətbuat xidmətinin rəhbəri İradə İbrahimova APA-ya bildirib ki, modul tipli çirkab su təmizləyici qurğuların quraşdırıldığı ərazilərdə aparılan monitorinqin nəticələrinə əsasən 2007-ci illə müqayisədə mikrobioloji çirklənmənin qarşısı alınıb.

Artıq Abşeron yarımadasının şimal zonasındakı ərazilərdən dənizə axıdılan tullantı suları idarə olunur. Belə ki, təmizləyici qurğuların istismarı müddətində dənizdə mikrobioloji çirklənmənin dərəcəsi tədricən azalmağa başlayıb, son 2 il ərzində qeyd olunan sahələrdə bağırsaq çöplərinin miqdarı minimum həddə çatıb. Bilgəh, Buzovna, Mərdəkan, Pirşağı, Nardaran sahil zolaqlarında, “Amburan” çimərliyi ərazisində, eləcə də Novxanı və Corat bağlarının sahil boyu ərazilərindəki çimərliklərdə çirklənmə dərəcəsi norma daxilindədir. Lakin belə qurğuların quraşdırılmadığı məntəqələrdə - Səbayel rayonun Şıx və Qaradağ rayonun Sahil qəsəbəsinin çimərlik ərazisində ötən il olduğu kimi, bu il də mikrobioloji çirklənmə qeydə alınıb. Böyük həcmdə tullantı suları müvafiq norma və standartlara uyğun təmizlənmədən dənizə axıdıldığına görə qeyd olunan ərazilərdə bağırsaq çöpü bakteriyalarının miqdarı normadan artıq müəyyən edilib.

Nazirlik Abşeron yarımadasında yerləşən çimərliklərin dəniz suyu üzərində aparılmış laboratoriya təhlillərinin orta göstəricilərini də dəqiqliklə açıqlayıb:

	Rayonun adı	Çimərlik-lərin adı	Mikrobioloji çirklənmə dərəcəsi, bağırsaq çöpü bakteriyalarının miqdarı (ədəd/litr) Norma göstəricisi < 5000
			2007	2008	2009	2010-cu ilin cari dövrü
1	Sumqayıt	Sumqayıt	12800-310000 çirkli	11500-260000 çirkli	10300-250000 çirkli	9500-180400 çirkli
2	Binəqədi	*Novxanı	14300-25000 çirkli	9800-17000 çirkli	7600-8900 zəif çirkli	normal
3	Sabunçu	*Pirşağı	9600-15600 çirkli	normal	normal	normal
4	Sabunçu	*Nardaran	6400-9900 Zəif çirkli	normal	normal	normal
5	Sabunçu	*Bilgəh	4700-7800 Zəif çirkli	normal	normal	normal
6	Xəzər	*Zaqulba	Normal	normal	normal	normal
7	Xəzər	*Buzovna	6300-12700 çirkli	normal	normal	normal
8	Xəzər	*Mərdəkan	6400-13500 çirkli	normal	normal	normal
9	Xəzər	*Şüvəlan	6400-14100 çirkli	normal	normal	normal
10	Suraxanı	Hövsan	10500-13700 çirkli	15500-13000 çirkli	14300-11000 çirkli	normal
11	Səbail	Şıx	8000-14500 çirkli	7700-14300 çirkli	7200-13500 çirkli	4500-11200 çirkli
12	Qaradağ	Sahil	7500-11500 çirkli	7600-11400 çirkli	7500-10500 çirkli	3000-13800 çirkli

Qeyd: < 5000 – normal, 5000-10000 – zəif çirkli, >10000 – çirkli
* - lokal modul tipli təmizləyici qurğuların mövcud olduğu yerlər

İ. İbrahimova deyib ki, Sumqayıt və Sahil qəsəbəsinin “Sahil”, “Şıx” çimərliklərindən başqa modul tipli təmizləyici qurğular quraşdırılmış qəsəbələrin sahil zolağındakı çimərlik sahələri yay mövsümündə çimərlik kimi istifadəyə yararlıdır.